Azərbaycan, Bakı, 17 avqust /Trend, müxbir H. Vəliyev/
"Windows 8" platformasının Azərbaycanın əməliyyat sistemləri bazarında payı 2,5 dəfədən çox artıb. Trend-in məlumatına görə, bu barədə şənbə günü "Global Stats" Statistika Mərkəzinin yaydığı məlumatda deyilir.
Azərbaycanın əməliyyat sistemləri bazarının 4,8 faizi "Windows 8" əməliyyat sisteminə məxsusdur.
"Global Stats"-ın hesabatında bildirilir ki, hesabat dövrü ərzində "Windows XP"in bazar payı 22,12 faiz, ötən ilin analoji dövründə qeydə alınan göstəricilərlə müqayisədə isə 40,94 faiz azalıb. Azərbaycanın əməliyyat sistemləri bazarının 23,47 faizi "Windows XP" əməliyyat sisteminə məxsusdur.
İlin əvvəlindən Azərbaycanda "Microsoft Windows 7" əməliyyat sistemi bazarının payı 2,7 faiz artıb.
Azərbaycanda ən populyar əməliyyat sistemi "Windows 7"dir və bazarın 66, 35 faizindən çoxu "Windows 7"yə məxsusdur. 2012-ci ilin müvafiq dövrü ilə müqayisədə "Windows 7" bazarının payı 17,78 faiz artıb.
Ötən dövr ərzində iOS installyasiyalarının sayı üzrə 68,5 faiz artım qeydə alınıb. iOS installyasiyalarının Azərbaycanın əməliyyat sistemləri bazarındakı payı 2,36 faizdir.
Azərbaycanın əməliyyat sistemləri bazarının 1,54 faizini tutan "Android" bazarının payında 185,1 faiz artım qeydə alınıb ki, bu da ötən ilin göstəricisindən 7 dəfə artıqdır.
Sonrakı yerləri isə "Windows Vista" əməliyyat sistemi (1,3 faiz) və" MacOSX" (0,49 faiz) tutur.