Azərbaycan, Bakı, 20 sentyabr /Trend, müxbir A.Axundov/
2013-cü ildə Avropa Yenidənqurma və İnkişaf Bankı (AYİB) Azərbaycandakı 12 layihəyə 50 milyon avro sərmayə yatırıb. Trend-in məlumatına görə, bu barədə Trend-ə cümə günü açıqlamasında AYİB-in Azərbaycan nümayəndəliyinin rəhbəri Nil Makkeyn bildirib.
"İlin əvvəlindən biz 12 layihəyə 50 milyon avro sərmayə yatırmışıq. Yol infrastrukturunun yaxşılaşdırılması və digər sahələrdə böyük layihələrin təsdiqlənəcəyini gözlədiyimizdən ilin sonuna kimi bu rəqəmlər əhəmiyyətli dərəcədə dəyişəcək".
Onun sözlərinə görə, bank bu ilə olan biznes planını qabaqlama ilə icra edir: "Biz gözlədiyimizdən çox maliyyələşdirmişik. Bu həm layihələrin sayına, həm də həcminə aiddir. Hazırda özəl sektorda çox yaxşı inkişaf gedir. Biz bunu hiss edirik. Bizimlə işləmək istəyənlərin sayı çoxalıb və belə şirkətlərin keyfiyyəti iki il əvvələ nisbətən çox yaxşıdır".
Bu gün Azərbaycanda olan layihələrə AYİB ümumilikdə 1,5 milyard avro həcmində 134 kredit ayırıb.
