Azərbaycan, Bakı, 13 noyabr /Trend, müxbir S.Ağayeva/
Azərbaycan hökuməti Çexiya ilə hazırda əsasən enerji sektorunun məhsullarından ibarət əmtəə dövriyyəsinin strukturunun şaxələndirilməsində maraqlıdır. Bunu çərşənbə günü Trend-ə Azərbaycanın Çexiyadakı səfiri Tahir Tağızadə deyib.
Onun sözlərinə görə, hazırda qarşılıqlı ticarət dövriyyəsinin həcmi 1,5 milyard dollar təşkil edir: "Bu məbləğin təqribən 1,3 milyard dolları enerji sektoru məhsullarının - neft məhsulları və digərlərinin payına düşür. Hazırda məqsədimiz əmtəə dövriyyəsinin strukturunun şaxələndirilməsidir".
Diplomat qeyd edib ki, son vaxtlar hər iki tərəfin iqtisadi əməkdaşlığı genişləndirməyə dair müəyyən marağının olması müşahidə edilir, lakin hələ də disbalans qalır.
T. Tağızadə bildirib ki, qarşıya qoyulan məqsəd Azərbaycandan Çexiyaya qeyri-enerji sektoru məhsullarının ixracını genişləndirməkdir.
Onun sözlərinə görə, tərəflər gələcək əməkdaşlığı əhatə edən bütün məsələləri dekabrın 9-10-da Bakıda keçiriləcək İqtisadi, elmi-texniki və mədəni əməkdaşlıq üzrə Çexiya-Azərbaycan birgə hökumətlərarası komissiyasının növbəti iclasında müzakirə edəcəklər.
Bu, komissiyanın ikinci iclasıdır, birinci iclas 2011-ci ilin noyabrında Praqada baş tutmuşdu.
Birgə hökumətlərarası komissiyanın həmsədrləri Çexiyanın sənaye və ticarət nazirinin müavini Milab Qovorka və Azərbaycanın iqtisadiyyat və sənaye nazirinin müavini Niyazi Səfərovdur.
