Azərbaycan, Bakı, 16 may /Trend, müxbir E.Əliyev/
Avropa Yenidənqurma və İnkişaf Bankı (AYİB) Azərbaycanın bank sektorunda birləşmələrin olacağını istisna etmir və həmin birləşmələrdə iştirak etməyə hazırdır. Bu barədə cümə günü Trend-ə AYİB-in Bakıdakı nümayəndəliyinin rəhbəri Nil Makkeyn bildirib.
N.Makkeyn deyib: "Biz 2015-ci il yanvarın 1-dən tam olaraq qüvvəyə minəcək bankların kapitalına minimum tələblərin artırılmasının bank iştirakçılarına konsolidasiya təzyiqini gücləndirəcəyini gözləyirik. Biz bu ilin və ya gələn ilin əvvəlində baş verə biləcək hər hansı mümkün birləşmələrdə iştiraka hazırıq. Hazırda ölkədə 43 bank fəaliyyət göstərir və bu, Azərbaycan üçün nisbətən çoxdur. Həm də pul deyil, daha çox insan kapitalı və 43 maliyyə qurumunda ixtisaslı mütəxəssislərin yetərli sayının olması nöqteyi-nəzərindən. AYİB Azərbaycan Mərkəzi Bankının qeyri-inzibati metodlarla bankların konsolidasiyasının stimullaşdırılması üzrə siyasətini tam dəstəkləyir".
Onun sözlərinə görə, hazırda AYİB ölkədəki üç kommersiya bankında paya malikdir: "Bunlar "AccessBank", "DemirBank" və "Unibank"dır. Eləcə də biz əbədi olaraq səhmdar olmaq istəmirik və xüsusi çıxış strategiyasına malikik. Lakin bu mənim açıq şəkildə şərh edə biləcəyim məsələ deyil".
AYİB 1991-ci ildən bu günə kimi Azərbaycanda 146 layihəyə təxminən 1,8 milyard avro ayırıb. Göstərilən vəsaitin təxminən yarısı özəl sektora yönəldilib.
