Azərbaycan, Bakı, 16 sentyabr /Trend, müxbir Azad Həsənli/
Bu ilin yanvar-avqust aylarında Azərbaycandakı 28 sığorta şirkətinin 11-də sığorta haqlarının artımı, 17-də isə azalma qeydə alınıb. Trend-in məlumatına görə, bunu Azərbaycan Sığortaçılar Assosiasiyasının (ASA) sədri Orxan Bayramov mətbuat konfransında deyib.
Onun sözlərinə görə, bu ilin yanvar-avqust aylarında sığorta haqlarının həcminə görə bazarın lideri "Paşa Sığorta" şirkəti olub: "Şirkət ilk 8 ayda 35 milyon manat sığorta haqqı toplayıb. Sonrakı yerləri tutan "Azərsığorta"nın yığımları 28,4 milyon manat, "Atəşgah Həyat" şirkətinin yığımları isə 28,2 milyon manat olub. Sığorta yığımlarının həcminə görə ilk beşliyi "Paşa Həyat" (27,9 milyon manat) və "AzSığorta" (24,4 milyon manat) şirkətləri tamamlayır".
O.Bayramov qeyd edib ki, ümumilikdə bazarın təxminən 51%-i ilk beşlikdə təmsil olunan şirkətlərin payına düşür.
ASA rəhbəri deyib ki, ən az sığorta haqqı toplayanlar isə "Əmrah Sığorta" (581 min manat), "Era-Trans" (365 min manat), "Azərqarant" (323 min manat), "Günay Sığorta" (135 min manat), "Çartis Azərbaycan" (39 min manat) və "Royal Sığorta" (2255 manat) olub: "Bu şirkətlərin ümumi göstəricisi təxminən 1,45 milyon manat olub və ümumi sığorta yığımlarının təxminən 0,5%-ni təşkil edib".
O, əlavə edib ki, ümumilikdə 28 sığorta şirkətinin 10-da sığorta haqlarının həcmi 10 milyon manatdan artıq, 5 şirkətdə 5-10 milyon manat arasında, 7 şirkətdə 1-5 milyon manat arasında, 6 sığorta şirkətində isə 1 milyon manatdan aşağıdır.
O.Bayramovun sözlərinə əsasən, sığorta ödənişlərinin həcminə görə lider "Atəşgah Həyat" sığorta şirkətidir - 17,9 milyon manat: "Ödənişlərin həcminə görə sonrakı yerləri "Paşa Sığorta" (17,4 milyon manat), "Atəşgah Sığorta" (9,6 milyon manat), "Azərsığorta" (8,8 milyon manat), "Azərbaycan Sənaye Sığorta" (7,3 milyon manat), "AzSığorta" (6,5 milyon manat) və "AXA MBASK" (6,4 milyon manat) şirkətləri tutur. Bu şirkətlərin ödənişlərinin cəmi təxminən 74 milyon manat təşkil edir ki, bu da ümumi ödənişlərin 72%-i qədərdir".
O vurğulayıb ki, ən az ödəniş edən şirkətlər isə "Era Trans" (231,7 min manat), "Azərqarant" (47,4 min manat), "Günay Sığorta" (63 min manat), "Royal Sığorta" (8,3 min manat) və "Çartis Azərbaycan" (340 manat) olub: "Bu şirkətlərin ödənişi üzrə ümumi göstərici təxminən 350 min manat olub ki, bu da ümumi ödənişlərin 0,3%-ni təşkil edir".
