Azərbaycan, Bakı, 9 oktyabr /Trend, müxbir Emil İsmayılov/
Azərbaycan və Böyük Britaniya arasında ticarət əlaqələrinin genişləndirilməsində əsas vəzifə ümumi əmtəə dövriyyəsində saldonun bərabərləşdirilməsidir. Bunu cümə axşamı Trend-ə Azərbaycanın Böyük Britaniyadakı səfiri Tahir Tağızadə deyib.
Onun sözlərinə görə, ötən ilin yekunları üzrə iki ölkə arasında ümumi əmtəə dövriyyəsi 1,8 milyard dollar təşkil edib ki, bunun da 500 milyon manatı Azərbaycan ixracatının, qalan hissəsi Böyük Britaniya ixracatının payına düşüb.
T.Tağızadə qeyd edib ki, buna görə də əsas vəzifə saldonun bərabərləşdirilməsidir: "Bu, artıq bərabərləşir və vaxtilə nisbət birin dördə olub. Göründüyü kimi, bu, ötən ilin nəticələri üzrə təqribən birin 2,5-ə nisbətindədir".
Səfir əlavə edib ki, ümumi əmtəə dövriyyəsində (əməkdaşlığın indiki templəri nəzərə alınmaqla) saldonun bərabərləşdirilməsinə təqribən 7-8 il tələb olunacaq.
İki ölkə arasında hökumətlərarası komissiyanın yaradılması zəruriliyindən danışan diplomat vurğulayb ki, komissiyanın yaradılması ideyası Britaniya tərəfindən müsbət qarşılanıb, lakin bu proses xeyli vaxt apara bilər.
T.Tağızadənin sözlərinə əsasən, bu onunla izah olunur ki, Şimali Amerikada və Avropa qitəsində qurumlararası qarşılıqlı fəaliyyətin geniş yayılmasına baxmayaraq, bu sistem Böyük Britaniyada tez-tez tətbiq edilmir: "Təəssüf ki, ilk iclasın nə vaxt keçiriləcəyini deyə bilmərəm, çünki bu barədə yalnız komissiya yaradıldıqdan sonra danışmaq olar".
Bununla belə, səfir iki ölkə arasında əməkdaşlığın genişləndirilməsi üçün geniş imkanlar nəzərə alınmaqla komissiyanın yaradılmasının zəruriliyini qeyd edib.