Azərbaycan, Bakı, 31 oktyabr /Trend, müxbir İlahə Məmmədli/
Rusiyanın "VTB Kapital" investisiya şirkəti Azərbaycan şirkətlərinə investisiya bazarlarına çıxmağa və xarici bazarlarda öz səhmlərini yerləşdirməyə kömək edə bilər. Bu barədə Trend-ə Bank VTB (Azərbaycan) ASC-nin İdarə Heyətinin sədri Yuri Yakovlev bildirib.
O, qeyd edib ki, VTB qrupuna daxil olan "VTB Kapital" şirkəti bu gün dünyanın bütün maliyyə mərkəzlərində - Nyu York, London, Moskva, Honq Konq, Sinqapur və Dubayda təmsil olunur: "Və bu baxımdan biz investisiya bazarlarına çıxmaq istəyən, Sinqapur, Honq Konq, London, Nyu York birjalarında öz səhmlərini yerləşdirməyi planlaşdıran Azərbaycan şirkətlərinə əhəmiyyətli kömək göstərə bilərik. Bizim bu sahədə heç də pis olmayan iş təcrübəmiz var".
Onun sözlərinə görə, VTB uzun illər ərzində Rusiyada investisiya biznesi üzrə liderdir: "Ona görə də Azərbaycanda "VTB Kapital" ofisinin açılmasına birbaşa ehtiyac yoxdur, çünki biz (Bank VTB (Azərbaycan) - red.), necə deyərlər, şirkətin "front-office"i kimi çıxış edirik. Biz perspektivli sövdələşmə gördükdə, Moskva, London və digər bölmələrdəki həmkarlarımız ən qısa müddətdə strukturlaşa və müştərini maraqlandıran həlli tapa bilərik".
Y.Yakovlev ölkədə bu və ya digər yüksək keyfiyyətli məhsulların istehsalı üzrə birgə müəssisələrin yaradılması üçün bankın çalışdığı Azərbaycan şirkətlərini (VTB-nin xaricdəki şəbəkəsindən, Çin və Hindistandakı investorlardan istifadə etməklə) cəlb edəcəyinə ümid edir: "Eyni zamanda, bu, yeni iş yerlərinin açılmasını, bu layihələrin reallaşdırılmasını təmin edən infrastrukturların yaradılmasını nəzərdə tutan sosial proqramdır".
Hazırda VTB dünyanın 21 ölkəsində mövcuddur.
Bankın rəhbəri dəqiqləşdirib: "Bu, bizim böyük ehtiyatımızdır və bu işləri sistemli şəkildə aparmaq istəyirik. İlk növbədə, Azərbaycanın VTB-nin bank strukturlarının mövcud olduğu ölkələrlə əmtəə dövriyyəsinin həcmini təhlil etməyi, həmin bazarlarda çalışan Azərbaycan şirkətləri ilə yaxşı tərəfdaşlıq əlaqələri qurmağı planlaşdırırıq".
Onun sözlərinə görə, ümumilikdə Bank VTB-nin VTB Beynəlxalq Maliyyə Qrupunda olması mühüm rəqabət üstünlüyüdür. Bu, VTB Qrupunun imkanlarından Azərbaycanda iri biznesin kreditləşməsi üçün resursların cəlb edilməsinə və ona yerli bazarda heç də həmişə əlçatan olmayan digər xidmətlərin göstərilməsinə imkan verir.
VTB Qrupu 2014-cü ildə Azərbaycanda törəmə bankın əməliyyatlarının genişləndirilməsi üçün 247,7 milyon manat həcmində büdcə müəyyən edib.
Bank VTB (Azərbaycan) ASC VTB Bank ASC-nin törəmə bankıdır. Bank VTB (Azərbaycan) ASC-nin səhmdarları: VTB Bank ASC və "AtaHolding" ASC-dir. Bank VTB (Azərbaycan) ASC əsasən korporativ biznesi, kiçik və fərdi biznesi təmsil edən müştərilərə xidmət göstərir. Bu gün bank 9 filial və baş ofis yanında Müştəri Xidmətləri İdarəsi ilə təmsil olunub.
