Beynəlxalq Maliyyə Korporasiyası (BMK) Azərbaycan, Özbəkistan, Qazaxıstan, Qırğızıstan və Tacikistana ümumilikdə 30 milyon dollar vəsait ayıracaq. Bu vəsait həmin ölkələrdə lizinqin inkişaf etdirilməsinə sərf olunacaq. Bu barədə BMK-nın Azərbaycanda həyata keçirdiyi "Azərbaycanda Lizinqin İnkişafı" layihəsinin rəhbəri Elçin Əhmədov Trend xəbər agentliyinə müsahibəsində bildirdi.
Onun sözlərinə görə, 30 milyon dollardan 5 ölkənin hər birinə nə qədər vəsait düşəcəyi müəyyənləşdirilməyib. Hər bir ölkənin payına düşəcək vəsaitin həcmi həmin ölkədə lizinqin inkişafı prosesindən asılı olacaqdır. 30 milyon dolların sözügedən ölkələrdə fəaliyyət göstərən lizinq şirkətlərinə kredit şəklində ayrılacağını söyləyən E.Əhmədov eyni zamanda ayrılacaq vəsait hesabına BMK-nın lizinq şirkətlərinin nizamnamə kapitalında payçı kimi iştirak edəcəyini də istisna etmədi.
