Azərbaycanda fəaliyyət göstərən 14 mikromaliyyə təşkilatı tərəfindən iyulun əvvəlinədək müştərilərə 156,2 milyon dollar həcmində kredit verilib. Bu barədə Azərbaycan Mikromaliyyə Assosiasiyasından (AMA) Trend xəbər agentliyinə məlumat verilib.
Verilən məlumata görə, bu təşkilatların ümumi kredit portfelinin həcmi 45,5 milyon dolları ötüb. Bu mikromaliyyə təşkilatlarının 54,4 minə yaxın aktiv müştərisi vardır. Verilən kreditlər ümumilikdə ölkə əhalisinin 250 minə yaxınını əhatə edir. İlin sonunadək isə müştərilərə verilən kreditin həcminin 200 milyon dollara çatacağı proqnozlaşdırılır.
Qeyd edək ki, fəaliyyət göstərən mikromaliyyə təşkilatları tərəfindən müştərilərə 50 dollardan 125 min dollaradək kredit verilir.
Xatırladaq ki, AMA 2001-ci ilin dekabrında 8 təşkilatın təsisçiliyi ilə yaradılmışdır. Hazırda təşkilatın 15 üzvü vardır. Bunlardan 14-ü bilavasitə mikromaliyyə fəaliyyəti ilə məşğul olur, 15-ci təşkilat "Mercy Corps" isə bir neçə mikromaliyyə təşkilatına mikro kreditlər verməsi üçün vəsait ayırır.
