Dövlət Gömrük Komitəsi (DGK) Ümumdünya gömrük təşkilatı (ÜGT) Avropa regionu dövlətlərinin gömrük xidməti rəhbərlərinin növbəti üçüncü iclasına hazırlıq işləri aparır. İclas 2006-cı ilin 2-3 fevralında Bakıda keçiriləcək. DGK-də Trend ə bildirilib ki, bu məqsədlə Macarıstan Gömrük və Maliyyə Xidmətinin inteqrasiyası üzrə ofisin rəhbəri Qabor Xoka və onun müavini Aniko Şmidt Bakıda olub və DGK-nin sədri Kəmaləddin Heydərov onları qəbul edib. Səfərin məqsədi qarşıdakı iclasın təşkili məsələlərinin müzakirəsi olub.
DGK-də həm də qeyd olunub ki, hazırda üç işçi qrupu - AR DGK, Macarıstanın və ÜGT-nin gömrük xidmətləri tərəfindən konfransın təşkili üzrə müvafiq işlər aparılır.
"Hazırda iclasın gündəliyində müzakirə ediləcək məsələlər təfərrüatı ilə dəqiqləşdirilməyib" -deyə DGK-də bildirilib.
ÜGT Avropa regionu dövlətlərinin gömrük xidməti rəhbərlərinin ilk iclası 2004-cü ilin yanvarında Moskvada, ikinci iclas isə 2005-ci ilin fevralında Alma-Atada keçirilib.Ötən iclaslarda gömrük xidməti mövcud iqtisadi inkişafın əsas elementi kimi, gömrük sahəsində informasiya texnologiyaları və rabitə əlaqəsinin rolu, gömrük xidmətləri inkişafının katalizatoru, Atlantikadan Sakit okeanadək vahid nəqliyyat yolunun təmin edilməsi və digər bu kimi məsələlər müzakirə edilib. "Azərbaycan nümayəndə heyəti təşkilatın hər iki iclasında iştirak edib" -deyə DGK-də bildirilib.
