Vergilər Nazirliyi 3 ay ərzində 4 min vergi ödəyicisini ƏDV qeydiyyatından çıxarıb. Bu barədə Trend ə vergilər nazirinin müavini Natiq Əmirov məlumat verib. Artıq heç bir dövlət müəssisəsi və büdcə təşkilatları bu müəssisələrdən hesab-faktura qəbul edə bilməz. Bununla əlaqədar nazirlik bu vergi ödəyicilərinin siyahısını saytda yerləşdirib. Bu müəssisələr tərəfindən hesab-fakturalar əsasında əməliyyatların aparılması faktı aşkar olunduğu halda onlara qarşı maliyyə sanksiyaları tətbiq olunacaq.
N.Əmirov qeyd edib ki, bu vergi ödəyicilərinin heç birinin qeydiyyatı bərpa olunmayıb. Bu tədbirlər ƏDV ödəyicilərinin qeydiyyata alınma qaydalarının sərtləşdirilməsi, o cümlədən vergi borcu olan və bu vergini ödəməyənlərlə mübarizə ilə əlaqədar həyata keçirilir. Yanvarda araşdırmaların birinci mərhələsi başa çatıb və vergi orqanlarının apardığı tədbirlər nəticəsində qanunsuz fəaliyyət göstərən 1436 vergi ödəyicisi aşkar olunub. Bu gün ƏDV ödəyicisi kimi qeydiyyata alınanların sayı 10 mindir.
2001-2005-ci illər ərzində əlavə dəyər vergisi ödənilməmiş ümumi dövriyyə 17 trln manat təşkil edib. Bu dövriyyə vergi orqanlarının informasiya bazasının köməyi ilə aşkar olunub. Nəticədə dövlət büdcəsinə 3,132 trln manat məbləğində ƏDV-nin ödənilməsindən yayınmanın qarşısı alınıb.
