Azərbaycan hökumətindən Trend agentliyinə verilən məlumata görə, Beynəlxalq Valyuta Fondunun (BVF) Yaxın Şərq və Orta Asiya ölkələri ilə iş üzrə Departamenti missiyasının rəhbəri Vitaliy Kramarenko bu gün hökumətlə danışaqlara başlayıb. Onun ilk görüşü Maliyyə Nazirliyində keçirilib.
İlk müzakirələr ölkədəki makroiqtisadi vəziyyət, 2006-cı il bödcə proqnozunun icrası və 2007-ci il proqnozlarının hazırlanması haqqında olub. BVF misiyası həmçinin hökumətin cari ilə dair proqnozların artırılması ilə də maraqlanıb. Maliyyə naziri Əvəz Ələkbərovun fikrincə, bu məsələdə qeyri-müəyyənlik var, amma aprelin sonuna qədər büdcəyə yenidən baxılıb-baxılmayacağı aydınlaşacaq.
Kramarenko Azərbaycanla gələcək əməkdaşlığı BVF ilə sazişin 4 bəndinə əsasən gerçəkləşdirməyi və icmalın nəticələri haqqında ictimaiyyəti məlumatlandırmağı təklif edib. BVF missiyasının növbəti səfəri sentyabrın əvvəlində baş tutacaq.
Hazırkı səfər isə aprelin 18-dək davam edəcək. Hökumət nümayəndələri ilə danışaqlardan başqa, qonaqlar Azeriqazbank, Beynəlxalq Bank və Bank of Baku kimi yerli banklarda da görüşlər keçirməyi planlaşdırır.
Dünən BVF ekspertləri BP şirkətinə baş çəkib.
