İyulun 27-də Astanada Azərbaycan, Türkiyə, Gürcüstan, Qazaxıstan və Çinin nəqliyyat nazirlərinin görüşü keçiriləcək. Görüşdə Qars-Axalkalaki-Tiflis-Bakı dəmir yolunun açılması layihəsinin müzakirəsi nəzərdə tutulur. Trend in xəbər verdiyi kimi, bu barədə nəqliyyat naziri Ziya Məmmədov məlumat verib.
Sabah Gürcüstanda işçi qruplarının görüşü başlayır. Görüşdə layihə üzrə TİƏ-nin son variantının müzakirəsi nəzərdə tutulur. Gürcüstan tərəfinin TİƏ üzrə öz təklifləri var. Bu ölkə gələcəkdə infrastrukturun modernləşdirilməsinə dair bəzi məsələlərin layihədə nəzərə alınmaması ilə bağlı məsələ qaldırır.
Gürcüstan tərəfi layihə üzrə təkliflər hazırlayıb. Bu təkliflərin ekspertlərin görüşündə müzakirəsi planlaşdırılır. TİƏ-nin son variantı Qazaxıstanda nazirlərin görüşündə müzakirəyə çıxarılacaq.
Qars-Axalkalaki-Tiflis-Bakı dəmiryolu nəqliyyat dəhlizinin inşası layihəsinə 98 km uzunluğunda Qars-Axalkalaki dəmir yolu qolunun inşası daxildir (bunun 68 km-i Türkiyə, 30 km isə Gürcüstan ərazisinin payına düşür). Bundan başqa Axalkali-Tiflis hissəsində də müəyyən yenidənqurma işləri həyata keçirmək lazımdır. Layihənin orta dəyəri $400 mln qiymətləndirilir. Nazirin sözlərinə görə, əlavə işlər layihənin dəyərinə güclü təsir etməyəcək.
