Bu gün Azərbaycanın şimal-şərq bölgələrinin inkişafı üzrə (North Development Project) Beynəlxalq kənd təsərrüfatının inkişaf fondu (İFAD) ilə birgə həyata keçirilən layihə çərçivəsində ikigünlük seminar başa çatıb. Kənd Təsərrüfatı Nazirliyi yanında kənd təsərrüfatı kreditləri üzrə dövlət agentliyindən Trend ə verilən xəbərə görə, seminar layihənin reallaşmasının rəsmi başlanğıcı olub.
Tədbirdə layihənin əsas istiqamətləri və layihə çərçivəsində nəzərdə tutulmuş işlər müəyyən olunub. Seminarın ilk günü kənd təsərrüfatı naziri İsmət Abbasovun sədrliyi altında keçib. Ümumilikdə, seminarın işində bir sıra dövlət idarələrinin - Kənd Təsərrüfatı, Maliyyə, İqtisadi İnkişaf, Vergilər Nazirliklərinin, Dünya Bankı, Asiya İnkişaf Bankı, BMT-nin inkişaf proqramı kimi beynəlxalq təşkilatların nümayəndələri iştirak edib. İFAD tərəfdən görüşdə Yaxın Şərq və Şimali Afrika şöbələrinin direktoru Mona Bişay və ölkə üzrə menecer Abdalla Raxman iştirak edib.
Azərbaycanın şimal-şərq bölgələrinin inkişafına yönəldilmiş layihə 15012 ailənin yaşam şəraitinin yaxşılaşmasına səbəb olacaq. Layihənin Abşeron, Siyəzən, Dəvəçi və Xızı kimi bölgələrdə həyata keçirilməsi hesabına ikinci və üçüncü dərəcəli suvarma, həmçinin əsasən yoxsulluq səviyyəsinin azaldılmasına yönəldilmiş marketinq tədbirləri həyata keçiriləcək. Layihə çərçivəsində həmçinin bölgələrdə ümumi məbləği təxminən 4 mln. 500 min ABŞ dolları olan ortamüddətli kreditlərin verilməsi nəzərdə tutulub.
Layihənin ümumi dəyəri 25 mln. 148 min ABŞ dolları məbləğində qiymətləndirilir və bunun təxminən 12 mln. ABŞ dolları İFAD tərəfindən ayrılıb.
Saziş 19 iyul 2005-ci ildə Kənd Təsərrüfatı Nazirliyində nazir İsmət Abbasov və İFAD-ın ölkə üzrə meneceri Abdalla Raxman tərəfindən imzalanıb.