2006-cı ilin sonunadək Azərbaycan İnvestisiyaların Təşviqi və İxrac Fondu (AZPROMO) daha 20-25 biznes-forum təşkil etməyi planlaşdırır. AZPROMO-nun prezidenti Emil Məcidovun Trend ə verdiyi məlumata görə, bu il 40 biznes-forumun keçirilməsi planlaşdırılırdı.
"İlin qalan dövrü ərzində Misir, Rumıniya, Qazaxıstan, Hindistan, Latviya, Estoniya, ABŞ, İtaliya, Almaniyada biznes-forumlar keçiriləcək, , həmçinin, ola bilsin ki, Böyük Britaniya və Koreyada da forumlar təşkil edilsin", - deyə E.Məcidov qeyd edib. Sentyabrın sonunda Koreya və Misirdə biznes-forumun keçirilməsi gözlənilir. Pribaltika ölkələrində isə biznes-forumun oktyabrda keçirilməsi planlaşdırılır.
Azərbaycanın Misirdəki səfiri səfərin təşkili üzrə fəal iş aparır. "Yəqin ki, Azərbaycana əczaçılıq, mebel istehsalı və ticarət sahələrində fəaliyyət göstərən 10 nəfərdən ibarət qrup gələcək. Azərbaycanın ərzaq məhsulları rəqabət qabiliyyətlidir, ancaq nəqliyyat xərclərinin baha olması yeganə problem olaraq qalır. Və bu məsələyə hökumətlərarası komissiya çərçivəsində baxıla bilər", - deyə E.Məcidov qeyd edib.