Azərbaycan hökumətinin 2007-ci ildə müasir avrobondların buraxılması ilə bağlı planları birmənalıdır. Hökumətdən Trend ə verilən məlumata görə, gələn il, ümumilikdə, $300 mln. məbləğində avroistiqrasların buraxılması proqnozlaşdırılır.
Bir qədər əvvəl müasir avrobondların ilk buraxılışı $250 mln.həcmində, dövriyyənin optimal müddəti isə 5 il təklif olunurdu.
Avroistiqrasların emitenti kimi Maliyyə Nazirliyi çıxış edəcək, buraxılışın müddəti və şərtləri isə beynəlxalq maliyyə insititutları ilə danışıqlardan sonra müəyyən olunacaq.
Maliyyə Nazirliyi hələ ki, avrobondların buraxılmasını təşkil edəcək şirkətin seçiminə başlamayıb. Maliyyə naziri Samir Şərifovun birldiyinə görə isə, avrobondların buraxıldığı təqdirdə bu iş, birinci növbədə, ölkənin ikinci reytinq agentliyinin cəlbi üzrə məsləhətçisi "City Group"la imzalanmış müqavilə çərçivəsində "City Group"a təklif olunacaq.
"Təbii ki, bu, "City Group"un maliyyə vəziyyətinin nə dərəcədə yaxşı olmasından asılı olacaq. Bundan başqa, avrobondların buraxılması ilə bağlı ölkəyə yardım etmək istəyində olanlardan hazırda çoxlu sayda təkliflər gəlməkdədir", - deyə maliyyə naziri qeyd edib.
Azərbaycanın ikinci reytinq alması ("Moody`s Investors"dən 2006-cı ilin sentyabrın 14-də) faktı ölkəyə istənilən an beynəlxalq kapital bazarına çıxmağa imkan verir. Buraxılış planlarının gələn ilə saxlanılmasını hökumət tərəfindən düşünülmüş bir addım kimi hesab etmək olar, belə ki, "Fitch Ratings" tərəfindən yeni reytinqin alınması 2006-cı ilin sonunda gözlənilir və bu, daha da səmərəli şərtlərlə xarici bazarlardan borc götürməyə imkan verəcək.
