...

Dünya Bankının nəqliyyat missiyasının Bakıya səfəri gözlənilir

Biznes və iqtisadiyyat xəbərləri Materials 26 Oktyabr 2006 21:01 (UTC +04:00)

Dünya Bankının nəqliyyat infrastrukturu üzrə mütəxəssisi Olivye Le Berin başçılıq etdiyi nəqliyyat missiyası birhəftəlik səfərlə noyabrın 6-da Bakıya gələcək. Bankın Bakı ofisindən Trend ə verilən məlumata görə, səfərdə əsas məqsəd Gəncə-Qazax, Bakı-Şamaxı-Muğan və Ələt-Masallı avtomagistrallarının rekonstruksiyası sahəsində həyata keçirilən layihələrin gedişi ilə tanış olmaqdır.

Uzunluğu 94 km olan Gəncə (Şəmkir) - Qazax yolu üzrə layihənin gerçəkləşdirilməsi 2007-ci ildə başa çatacaq. Layihənin ümumi dəyəri $48 mln-dur. İki zolaqlı yolun inşası üçün DB $40 mln. kredit ayırıb. Layihənin maliyyələşməsi həmçinin TASİS-in ayırdığı $1,5 mln. dəyərində qrant və hökumətin ayırdığı $6,5 mln. vəsait hesabına həyata keçirilir. Layihənin podratçısı "Turan Xəzinədaroğlu", "Azərkörpü" və "Avtoban" şirkətləridir.

Digər iki yol bir layihədə cəmləşdirilib. Layihə Ələt-Masallı avtomagistralının genişləndirilməsini və marşrutun dəyişdirilməsini nəzərdə tutur. Nəticədə yolun uzunluğu 230 km-dən 200 km-ə qədər azalacaq. Layihəyə əsasən, həmçinin Bakını ölkənin qərb rayonları ilə birləşdirən Bakı-Şamaxı-Muğan yolunun təmiri nəzərdə tutulub.

Bu yolların rekonstruksiyasına DB $200 mln. məbləğində kredit ayırıb. Hər iki layihə üçün çatışmayan vəsaitlər ikici kredit çərçivəsində ayrıla bilər. Bankın missiyası ilə həmin vəsaitlərin ayrılması məsələsi və yolların rekonstruksiyasına dair digər aspektlər nəzərdən keçiriləcək.

Kredit vəsaitlərinin istifadəsinə 2006-cı ilin sonuna kimi başlanacaq. Hal-hazırda Bakı-Şamaxı-Muğan yolunun inşası layihəsi üzrə məsləhətçi müəyyən olunur. Ələt-Masallı yolu üzrə isə məsləhətçi Finlandiyanın "Finroad Ltd." konsaltinq şirkəti olub.

Xəbər lenti

Xəbər lenti