2006-cı ilin sonunadək Asiya İnkişaf Bankı (AİB) mikro və kənd maliyyələşdirilməsinə kredit üzrə Azərbaycan höküməti ilə danışıqları bərpa etmək niyyətindədir. Bu barədə Trend ə AİB-in Bakı nümayəndəliyindən məlumat verilib. hökümət krediti dövlət zəmanəti altında almaqdan imtina edib və bankdan kreditin istifadə olunma strukturunu dəyişdirməsini və onun özəl sektora köçürülməsini xahiş edib.
AİB hökümətə həcmi sonradan 100 mln. ABŞ dollarına çatdırmaqla, 25 mln. ABŞ dolları həcmində krediti verməyə hazır olduğunu bildirib. Kredit vəsaitləri mikromaliyyələşdirmənin və bankların regional filial şəbəkələrinin və onların əməliyyatlarının inkişafı üçün nəzərdə tutulmuşdu. Məhz bank infrastrukturunun inkişafını nəzərdə tutan komponentin layihəyə daxil edilməsi ilkin olaraq layihənin hökümətdə razılaşdırılmasının gecikməsinə, sonra isə dövlət zəmanəti altında kreditin alınmasına imtina etmək üçün səbəb oldu.
Layihənin strukturunun dəyişməsi ilə əlaqədar layihədən asılı olaraq kreditin həcminin də dəyişilmə ehtimalı istisna olunmur.
