Kənd Təsərrüfatının İnkişafı üzrə Beynəlxalq Fond (İFAD) Azərbaycan hökuməti ilə əməkdaşlığın davam etdirilməsi istəyini və ölkənin qərb bölgələrinin inkişafı üzrə yeni layihələrə başlamaqda maraqlı olduğunu bildirib.
Kənd Təsərrüfatı Nazirliyi yanında kənd təsərrüfatının kreditləşdirilməsi üzrə Dövlət Agentliyinin baş direktoru Razim Vəliyev Trend ə bildirib ki, bugünədək beynəlxalq təşkilatların həyata keçirdiyi layihələrə qərb bölgəsi daxil edilməyib. "İFAD ekspertləri artıq bir neçə araşdırma aparıb və oktyabrın 29-da təşkilatın ekspert qrupu qərb rayonlarına baş çəkmək üçün Azərbaycana gələcək. Layihənin gerçəkləşdirilməsi çox vaxt və araşdırmaların aparılmasını tələb edir", - deyə R.Vəliyev hesab edir.
IFAD artıq layihəyə 4 - Ağstafa, Qazax, Şəmkir və Tovuz rayonlarını daxil etməyi təklif edib. Dövlət Agentliyinin rəhbəri hesab edir ki, İFAD və Azərbaycan hökuməti arasında razılıq əldə olunarsa, bu, həmin beynəlxalq institutla həyata keçirilən üçüncü layihə olacaq.
Maliyyə vəsaitlərinin həcmi hələ müəyyən olunmayıb. Ancaq fondun kreditləri adətən $10-12 mln-u keçmir.
Bu yaxınlarda IFAD "Azərbaycanın şimal-şərq bölgələrinin inkişafı" adlı ikinci layihənin gerçəkləşdirilməsinə başlayıb. Layihə Xızı, Siyəzən, Dəvəçi və Abşeron rayonlarını əhatə edəcək. Layihənin ümumi dəyəri $25,148 mln. təşkil edir. Layihə üzrə kredit sazişi 19 iyul 2005-ci ildə imzalanıb. Layihə çərçivəsində $10 mln. vəsait meliorasiya işlərinə, $6 mln. - su istifadəçiləri assosiasiyalarının yaradılmasına, $5 mln. - kreditin ayrılmasına, yerdə qalan vəsait isə işçi qrupunun saxlanmasına yönəldiləcək.
İFAD-ın "Dağ və yüksək dağ rayonlarında kənd təsərrüfatının inkişafı" üzrə birinci layihəsi (bu layihə üzrə kredit sazişi 27 noyabr 2000-ci ildə imzalanıb) hələ də həyata keçirilir. 7 illik layihənin ümumi büdcəsi İFAD-ın ayırdığı $9 mln. və hökumətin $1,5 mln. vəsaiti daxil olmaqla, o cümlədən kənd icmalarının iştirakı ilə $10 mln. təşkil edir. Bu ildən başlayaraq layihənin əhatə zonası genişlənib və Lerik, Gədəbəy, Şahbuz, Qəbələ və Quba rayonlarından başqa, işlərə İsmayıllı və Daşkəsən rayonlarında da başlanılıb.
