Azərbaycanın kiçik şəhərlərində su təchizatı və kanalizasiya sisteminin yaxşılaşdırılması layihəsinin hazırlanmasının davam etdirilməsi məqsədilə yanvarın 10-dan etibarən DB missiyasının layihələr qrupu rəhbəri Andreas Rodenin başçılığı altında Bakıya səfəri başlanır.
Bankın Bakı nümayəndəliyindən çərşənbə axşamı Trend ə bildiriblər ki, səfər yanvarın 18-nə kimi sürəcək və missiyanın bu səfəri çərçivəsində layihənin komponentləri konkretləşdiriləcək.
Ümumilikdə layihəyə 20 rayon daxil ediləcək, lakin 10 rayon üzrə artıq texniki-iqtisadi əsaslandırmanın hazırlıq işləri başlanıb. Gələcəkdə daha 10 rayonun daxil edilməsi planlaşdırılır, lakin bu, mərhələ-mərhələ baş verəcək, artıq razılaşdırılmış rayonlarda fiziki işlər başa çatdırıldıqdan sonra bu rayonlarda hazırlıq işlərinə başlanılacaq.
DB-nin Azərbaycan hökuməti ilə əməkdaşlıq strategiyasına (207-2010-cü illər) uyğun olaraq bank 2007-ci maliyyə ilində su təchizatı və kanalizasiya sisteminin yaxşılaşdırılması üçün 220 mln. dollar ayırmağı planlaşdırıb. 2009-2010-cu illərdə isə bu məqsədlə daha 200 mln. dollar verilməsi nəzərdə tutulub.