"Azərbaycan investisiya şirkəti" "Gəmi sahibi şirkəti"nin yaradılması üçün tələb olunan məbləği açıqlayıb
I rüb ərzində "Azərbaycan investisiya şirkəti" (AİŞ) SC Azərbaycanda neft yüklərinin daşınması ilə məşğul olacaq "Gəmi sahibi şirkəti"nin yaradılması ilə bağlı müəyyən qərar qəbul edəcək.
AİŞ-in icraçı direktoru Anar Axundovun Trend ə eksklüziv olaraq xəbər verdiyi kimi, ilkin qiymətləndirmələrə görə, belə şirkətin yaradılması üçün təxminən 100 mln. ABŞ dolları məbləğində sərmayə tələb olunur.
Bu kapitalın səhm iştirakı və cəlb olunmuş kredit hesabına formalaşdırılması planlaşdırılır.
Hazırda investisiya şirkəti belə şirkətlərdə operatorluq təcrübəsinə malik xarici investorlarla danışıqlar aparır.
A.Axundov xarici investorlarla yanaşı, yerli investorların da cəlb olunacağı imkanını istisna etmir.
"Ən başlıcası- strateji tərəfdaşlığı müəyyənləşdirməkdir, investor diapazonunun genişləndirilməsi isə bizim maraqlarımız çərçivəsindədir, belə ki, AİŞ minoritar səhmdar qalacaq. AİŞ-in bu layihədə 20-30% səviyyəsində iştirak edəcəyi gözlənilir", - deyə A.Axundov qeyd edib.
"Gəmi şirkəti"nin yaradılması ideyası neft hasilatı həcmlərinin artması ilə bağlı yaranıb və bununla əlaqədar əlavə xidmətlər göstərməklə dövlətin neft tranzitindən gəlirlərinin artırılması planlaşdırılır.
İlk növbədə, bu şirkət Azərbaycan neftini Batumi, Supsa və Ceyhan limanlarından Qara və Aralıq dənizlərinin sahilində yerləşən ölkələrə, eləcə də Qərbi Avropa ölkələrinə tədarük edəcək.
