"Aqrar-kredit" səhmdar kredit təşkilatı "Kənd yerlərinin kreditləşdirilməsi", "Təsərrüfatların özəlləşdirilməsi" və Sahibkarlığa Dəstək Milli Fondunun səlahiyyətli agenti qismində üç layihə çərçivəsində kreditləşməni davam etdirir.
Trend "Aqrar-kredit"in idarə heyətinin sədri Məmməd Musayevə istinadən xəbər verir ki, 1 yanvar 2007-ci il tarixində "Kənd yerlərinin kreditləşdirilməsi" layihəsinin xətti üzrə kredit təşkilatının öz vəsaitləri ilə təxminən 3 000 sahibkarlıq subyekti maliyyələşdirilib. Onlara 16,1 mln. manat məbləğində kredit verilib. Bu vəsaitlərdən 5,5 mln. manat 2006-cı ilin payına düşür.
SDMF vasitəsilə 274 sahibkar 2,8 mln. manat məbləğində maliyyələşdirilib.
"Aqrar-kredit" həmçinin 1998-ci ildən etibarən DB-nin kənd təsərrüfatında ilk layihəsi "Fermer təsərrüfatlarının özəlləşdirilməsi" layihəsinə rəhbərlik edir. Maliyyələşdirmə revolver fondda toplanan, əvvəllər verilmiş kreditlərin qaytarılması hesabına həyata keçirilir. Bərdə, Lənkəran, Ucar, Xaçmaz və Şərurun bütün kənd yerlərində özəl fermer təsərrüfatlarının inkişafı və formalaşması üçün layihənin reallaşdırılmağa başladığı vaxtdan 2007-ci ilin əvvəlinədək 5614 sahibkar maliyyələşdirilib, onlara 10,2 mln. manat məbləğində kredit verilib.
Ötən dövrdə "Aqrar-kredit" bütün istiqamətlər üzrə təxminən 9 000 sahibkara 29 mln. manat məbləğində kredit verib. Bunlardan 7,7 mln. manat (1075 subyekt üçün) 2006-cı ilin payına düşür. Bu, 20000-dən çox insanın işlə təmin olunması deməkdir.
M.Musayev qeyd edib ki, "Aqrar-kredit"in verdiyi kreditlərin qaytarılma əmsalı 96%-dən çoxdur.