Azərbaycan, Bakı / Trend , müxbir S.Əliyev/ Azərbaycan Dövlət Neft Şirkətinin yüksək vəzifəli şəxsinin verdiyi məlumata görə, ARDNŞ-ın "Bakı-Novorossiysk" neft kəmərində operatorluq əldə etməsi üçün şirkətin Rusiyanın "Transneft" şirkəti ilə yeni müqavilə bağlamasına ehtiyac yoxdur.
Onun sözlərinə görə, "Transneft" və Azərbaycan Beynəlxalq Əməliyyat Şirkəti arasında imzalanmış müqavilədə göstərilir ki, ABƏŞ operator vəzifəsini ARDNŞ-a ötürə bilər. İmzalanmış sənədə hər hansı dəyişiklik ediləcəyi təqdirdə, "Trasneft"lə yeni müqavilənin imzalanmasına ehtiyac olacaq.
Oktyabrın ortalarında ARDNŞ "Bakı-Novorossiysk" neft kəmərinin operatoru vəzifəsinin əldə edilməsi məsələlərinin razılaşdırılmasını başa çatdırmağı planlaşdırır.
ABƏŞ 1997-ci ildə gücü 50 mln. tona malik "Bakı-Tbilisi-Ceyhan" neft kəmərinin xeyrinə olaraq, 5 mln. ton gücə malik"Bakı-Novorossiysk" kəmərinin istismarından imtina edib. "Bakı-Tbilisi-Ceyhan" kəməri ilə ABƏŞ tərəfindən "Azəri-Çıraq-Günəşli" yatağından hasil olunan neft ixrac olunub.
ABƏŞ-in 1997-ci ildən "Bakı-Novorossiysk"in operatoru olmasına baxmayaraq ARDNŞ, həmçinin bu kəmər vasitəsilə yerli yataqlarda, BM və əməliyyat şirkətləri tərəfindən hasil olunan nefti nəql edir.
ARDNŞ-ın nümayəndəsinin sözlərinə görə, neft şirkəti kəmərlə 1 mln. ton neft nəql etməyi planlaşdırır.
"Kəmərlə, əsasən, 2008-ci ildə quruda işləyən birgə müəssisələr və əməliyyat şirkətlərinin hasil etdiyi neft nəql olunacaq. Kəmərlə ARDNŞ-ın hasil etdiyi neft də hissə-hissə nəql olunacaq" - deyə o bildirib.