Azərbaycan, Bakı/ Trend , müxbir İ.Xəlilova/ KfW Alman inkişaf bankının hidroenergetika üzrə məsləhətçisi, su - elektrik stansiyalarının tikintisi planlaşdırılan Qax-Zaqatala və Şəki regionlarının öyrənilməsinə başlayıb. Bu barədə cümə günü "Azərenerji" ASC-nin vitse-prezidenti Marlen Əsgərov məlumat verib. "Azərenerji" bu regionlarda 20 SES -in tikilməsini təklif edib və maliyyələşdiməni KfW-ə təqdim edib. Əsgərovun sözlərinə görə, yerlərin öyrənilməsi, suyun alınma mənbəyi və yerləşmə mövqeyinə görə SES tikintisinin dəyərinin müxtəlif olması səbəbindən vacibdir. Vitse-prezident, orta hesabla, su - elektrik stansiyasının 1 kVt gücünün 2-2.5 min. dollara bərabər olduğunu bildirib. Tikiləcək stansiyalar 1.5 -2 mVt gücündə olacaq. "Azərenerji" layihənin texniki-iqtisadi əsaslandırılmasını aparsa da, alman bankının maliyyələşdirmə barədə qərar qəbul edənədək araşdırmalar aparacağı istisna deyil. Bərpa olunan enerji mənbələri sahəsində bu, KfW-nin ilk layihəsidir. Əvvəllər bank alternativ enerji istehsalını maliyyələşdirməyi təklif etsə də, "Azərenerji"-nin şəbəkəsinə qoşulmaq üçün qanunvericilik olmadığından, bundan imtina edib.
...