Azərbaycan, Bakı, / Trend , müxbir S.Əliyev/ Xəzərin Azərbaycan sektorunda, "İnam" perspektiv strukturunda ikinci kəşfiyyat quyusunun təkrar qazma işləri davam edir.
"Hazırda quyunun dərinliyi 1000 metr təşkil edir və bu, problemli hissənin ( 500 metr dərinliyində) geridə qalmasından xəbər verir. Bu problemli hissə ilə əlaqədar olaraq birinci gövdə ləğv olunmuşdu" - deyə "İnam" layihəsinin operatoru olan "BP Azerbaijan"dan bildiriblər.
Bundan öncə BP şirkəti texniki səbəblər üzündən ikinci quyuda aparılan qazma işlərini dayandırıb və yeni quyunun qazılmasına başlayıb. Quyuda noyabrın ortalarında başlanan qazma işləri zamanı qazma üzrə podratçı şirkət yan sütunun enişində çətinliklə üzləşib.
Cədvələ əsasən, quyuda qazma işləri 200 gündən artıq davam edəcək.
"İnam" perspektiv dəniz strukturunun işlənməsi üzrə səhmdarların pay bölgüsü aşağıdakı kimidir: ADRDNŞ- 50%, BP- 25%, Koreyanın Milli Neft Şirkəti - 20%, RD/Shell - 5%.