Azərbaycan, Bakı, 11 fevral / Trend / "Azerbaijan gas supply company" ("Şah Dəniz" yatağından qaz tədarükü ilə məşğul olur, operator - Statoil) "Şah Dəniz" yatağından tədarük olunan Azərbaycan qazının dəyərinə dəyişiklik üzrə Türkiyə tərəfi ilə danışıqlar aparır. Bu barədə bazar ertəsi Azərbaycanın sənaye və energetika naziri Natiq Əliyev məlumat verib.
Nazir bildirib ki, qazın dəyərinə yenidən baxılması müddəti müqavilə üzrə razılaşdırılıb. O, Türkiyəyə qaz tədarükü başladığı vaxtdan bir il ərzidə olan dövrü əhatə edir. Bu gün Türkiyə üçün qazın dəyəri 1000 kub metrə 120 dollar təşkil edir.
"Azərbaycan qazı bazar qiymətləri ilə satılmalıdır" - deyə nazir bildirib.
"Şah Dəniz" dəniz yatağının işlənmə müqaviləsi 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, ARDNŞ - 10 faiz.
Bu yataqda qaz hasilatı 2006-cı ilin dekabrında başlanıb. Hazırda Gürcüstana və Türkiyəyə qaz "Cənubi Qafqaz" boru kəməri ilə nəql olunur. Qaz alıcısı mövqeyində həmçinin Azərbaycan da çıxış edir.
Hazırda yataqda dörd quyu fəaliyyət göstərir. Onların sutkalıq debiti 22 mln. kub metr qaz təşkil edir. Beşinci quyunun qazıntısı davam etdirilir.
"Şah Dəniz" yatağının ümumi qaz ehtiyatları 1,2 trln. kub metr qiymətləndirilir. Layihənin birinci mərhələsində hər il 8,8 mlrd. kub metr qaz hasilatı və qazın Azərbaycan, Gürcüstan və Türkiyəyə tədarükü nəzərdə tutulur. İkinci mərhələ çərçivəsində qaz hasilatı 20 mlrd. kub metrə qədər artırıla bilər. Layihənin ikinci mərhələsi çərçivəsində hasil ediləcək qazın Avropa ölkələrinə tədarük imkanları nəzərdən keçirilir.
Müəlliflə əlaqə saxlamaq üçün elektron ünvan: Seymur
