Azərbaycan, Bakı, 10 yanvar/ Trend / İranın neft nazirinin beynəlxalq məsələlər üzrə müavini Hüseyn Noqrekar Şirazi şənbə günü bildirib ki, İran "Şahdəniz" yatağının işlənməsi üzrə ikinci mərhələ çərçivəsində 1,7 mlrd. dollar sərmayə yatırmaq niyyətindədir.
"İran hazırda "Şahdəniz" yatağı layihəsinin birinci mərhələsində [NICO şirkəti vasitəsilə] səhmlərin 10 faizinə malikdir. Bizim ölkə bu beynəlxalq layihənin strateji tərəfdaşlarından biridir", - deyə Şirazi bildirib.
O əlavə edib ki, İran Azərbaycanın rəsmi şəxslərinə "Şahdəniz" yatağının işlənməsi üzrə ikinci mərhələ çərçivəsində iştirak etmək istəyi barədə məlumat verib.
"İkinci faza çərçivəsində "Şəhdəniz" yatağında hasilata 2013-2014-cü illərdə başlanacaq. Hazırda bir çox ölkələr "Şahdəniz" yatağından qaz almaq niyyətindədir, İran da öz təklifini verib", - deyə Şiraz bildirib.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz.
Bu yataqda hasilata 2006-cı ilin dekabrından başlanıb. Hazırda "mavi yanacaq" Cənubi Qafqaz boru kəməri vasitəsilə Gürcüstan və Türkiyəyə nəql olunur. Azərbaycan da qaz alıcısı qismində çıxış edir.
Yatağın işlənilmə layihəsinin birinci mərhələsi çərçivəsində ildə 8,8 mlrd. kubmetr qaz hasil ediləcəyi güman olunur. Bu həcm Azərbaycan, Gürcüstan və Türkiyəyə satılacaq. Reallaşdırılmasına 2012 - ci ildə başlanacaq ikinci mərhələ çərçivəsində hasilat 20 mlrd. kubmetrədək artırlacaq. Bu mərhəldə qazın Avropa ölkələrinə nəqli nəzərdə tutulub.
Məqalə müəllifi ilə əlaqə ünvanı - [email protected]