Azərbaycan, Bakı, 26 yanvar/ Trend , müxbir E.İsmayılov/ Gulf Drilling Supply FZE şirkəti (Birləşmiş Ərəb Əmirlikləri) fevralda Azərbaycanın quru ərazilərindəki yataqları istismar edən "Suraxanı oil" əməliyyat şirkəti üçün üç istismar quyusunun qazılmasına başlamağı planlaşdırır. Bu barədə bazar ertəsi şirkətin Azərbaycandakı nümayəndəliyinin direktoru İlham Babayev bildirib.
Quyuların dərinliyi 2200-2500 metr təşkil edəcək. Şirkət qazma zamanı Çin istehsalı olan ZJ-30 qurğusundan istifadə edəcək. Qazma işlərinin maksimal dərinliyi 3000 metrə çatacaq.
Gulf Drilling Azərbaycanın Balaxanı-Sabunçu-Ramana yatağını istismar edən "Azneftyağ" Birgə Müəssisəsindən 2300 metr dərinlikdə quyunun qazılması barədə sifariş alıb. Babayev əvvəllər bildirib ki, bu sifarişçi üçün ikinci quyunun qazılması barədə danışıqlar aparılır.
Babayev deyib ki, şirkət həmçinin Azərbaycanın quru ərazilərində və Gürcüstanda işləyən digər şirkətlər üçün işlərin yerinə yetirilməsi üzrə danışıqlar aparır.
Şirkətin Bakı ofisindən bildiriblər ki, şirkət il ərzində avadanlıq alınmasına təqribən 15 mln. manat sərf edib. Əldə edilən avadanlıqlar sırasında qazma qurğuları, quyuların əsaslı təmiri üçün avadanlıqlar, quyularda neft hasilatının səmərəliliyinin artırılması üçün avadanlıq və texnologiyalar var.
Məqalə müəllifi ilə əlaqə ünvanı - [email protected]
