Azərbaycan, Bakı, 06 fevral/ Trend , müxbir E.İsmayılov/ SOCAR Energy Georgia şirkəti (SOCAR şirkətinin Gürcüstanda törəmə müəssisəsi) yaxın vaxtlarda yeni ofisin tikintisi üzrə tammiqyaslı işlərə başlamağı planlaşdırmır. Bu barədə şirkətin rəhbəri Mahir Məmmədov bildirib.
"Hazırkı mərhələdə birinci faza - dəmir-beton karkas və bina arakəsməsinin montajı və tikintisi üzrə işlər aparılır. Tam tikinti barədə danışmaq hələ tezdir", - deyə Məmmədov bildirib.
Məmmədov tam tikintinin başlanması və yeni ofisin istifadəyə verilmə vaxtını açıqlamayıb.
Tenderin yeknu üzrə yeni ofis binasının tikintisini adı açıqlanmayan Gürcüstan şirkəti aparır.
SOCAR Georgia 4 min kvadrat metrdən çox sahəsi olan torpaq sahəsində tikiləcək binada yerləşəcək. Şirkət bu torpaq sahəsi üçün təxminən $3 mln. ödəyib.
SOCAR Energy Georgia Gürcüstanın neft və neft məhsulları bazarında distribusiya və marketinqlə məşğuldur. Şirkət Gürcüstan bazarında neft məhsulları və qaz satır, yanacaqdoldurma məntəqələri şəbəkəsinə malikdir. SOCAR Georgia-nın həmtəsisçiləri aşağıdakılardır: SOCAR - 51 faiz, Petro-Trans FZCO - 32,7 faiz və İvan Çxartişvili-dir - 16,3 faiz.
Məqalə müəllifi ilə əlaqə ünvanı- [email protected]