Azərbaycan, Bakı, 10 iyun / Trend , müxbir E.İsmayılov /
"Türkiyə Azərbaycana "Şahdəniz" yatağının işlənməsinin birinci və ikinci mərhələləri çərçivəsində dəyişilmiş qaz tariflərini təqdim edib. Onlar hazırkı dünya qiymətlərinə uyğundur", - çərşənbə günü Bakıda Türkiyə XİN-in enerji, su və ətraf mühit məsələləri üzrə baş direktorunun müavini Vural Altay deyib.
Azərbaycan qazına görə türk tərəfinin təklif etdiyi qiyməti Altay açıqlamayıb. "Bu kommersiya məsələsidir", - o əlavə edib.
"SOCAR nümayəndələri ilə son görüş zamanı türk tərəfi (Botaş) "Şahdəniz" yatağının işlənməsinin birinci və ikinci mərhələləri çərçivəsində qaz tarifləri və Azərbaycan qazının Türkiyə ərazisindən tranziti məsələsi də daxil olan təkliflər paketini təqdim edib. Hazırda SOCAR-ın cavabı gözlənilir", - Altay bildirib.
Danışıqlar SOCAR və Türkiyənin boru kəmər şirkəti Botaş arasında aparılır və Türkiyə baxılan məsələlər üzrə hər hansı müqavilənin imzalanmasına ümid edir. "Mən Azərbaycan tərəfi ilə ümumi razılığa gələ biləcəyimizə inanıram", - Altay qeyd edib.
Onun sözlərinə görə, qaz məsələsi ətrafında danışıqlar çoxdan aparılır, ancaq son zamanlar bu məsələdə mühüm irəliləyiş nəzərə çarpır.
"Bu yaxşı təklifdir və ümid edirəm ki, bizim azərbaycanlı qardaşlarımız bu təklifi qəbul edəcəklər", - Altay deyib.
Türkiyə və Azərbaycan arasında tranzit müqaviləsi Azərbaycan qazının Avropaya çıxarılması üçün vacibdir.
Hazırda Azərbaycan "Şahdəniz" yatağının işlənməsinin birinci mərhələsi çərçivəsində qazın qiymətini artırmaq niyyətindədir. Hazırda qaz Türkiyəyə hər min kubmetrə görə 120 dollar qiymətinə tədarük edilir. Ancaq bu qiymət 2001-ci ildə bağlanmış müqavilədə öz əksini tapıb.
Müqaviləyə əsasən Türkiyə "Şahdəniz" yatağının işlənməsinin birinci mərhələsi çərçivəsində ildə 6,6 milyard kubmetr qaz əldə etməlidir.
Bu tədarük həcminə tərəfdaşlar artıq bu il nail olacaqlar.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, SOCAR - 10 faiz. Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Məqalə müəllifi ilə əlaqə ünvanı: [email protected]