Azərbaycan, Bakı, 22 iyul / Trend , müxbir E.İsmayılov /
"ARDNŞ (Azərbaycan Respublikası Dövlət Neft Şirkəti) dekabrda "Lökbatan-Puta-Quşxana" quru ərazilərində geofizik tədqiqatlar nəticəsində əldə olunmuş məlumatların işlənməsi və interpretasiyasını başa çatdıracaq", - çərşənbə günü ARDNŞ-də işlərə yaxın mənbə deyib.
"Hazırda əldə olunan məlumatlar emal edilir. İnterpretasiya prosesi tam şəkildə dekabrın sonunda başa çatmalıdır", - mənbə qeyd edib.
Bir müddət əvvəl şirkət bu ərazilərdə geofizik tədqiqat (2D seysmika) işlərini başa çatdırıb və görülən işlərin nəticəsi müsbət dəyərləndirilib.
Bir müddət əvvəl ARDNŞ-dəki digər mənbə deyib ki, 2D seysmikanın aparılmasının əsas məqsədi məhsuldar plastın və onun altına yığılan çöküntülərin tektonik quruluşunun dəqiqləşdirilməsidir. Onun sözlərinə görə, işlər idarə tərəfindən iyunun 18-də başa çatdırılıb.
"Bu ərazilərdə tədqiqatlar apreldə başlayıb və "dərinlik nöqtəsi" və "sınan dalğa" metodları əsasında aparılıb", - mənbə qeyd edib.
Bu işlərin sifarişçisi qismində ARDNŞ-nin tərkibinə daxil olan "Azneft" İstehsalat Birliyi çıxış edir.
Azərbaycanda 57 neft-qaz yatağı var. Onlardan 18-i dənizdə, qalanı qurudadır. ARDNŞ-ın ştatında bu günə olan əməkdaşların sayı 62 min nəfərdən çoxdur.
Məqalə müəllifi ilə əlaqə ünvanı: [email protected]
