İranın "Sülh" qaz kəmərinin inşası üzrə danışıqlardakı nümayəndəsi Najatolla Hanimifard bildirib ki, danışıqlar Pakistan nümayəndəsi, energetika nazirinin müşaviri Asem Hüseynin istefaya getməsi səbəbindən təxirə salınıb, Pakistanın neft və təbii sərvətlər naziri vəzifəsinə isə Havid Qəmər təyin edilib. Bu barədə Şana agentliyi məluat verir.
Agentliyin məlumatına görə, Pakistanı "Sülh" qaz kəmərinə dair danışıqlarda Havid Qəmər təmsil edəcək.
Hanimifard qeyd edib ki, bu, Yaxın Şərqdən Asiyaya ilk boru kəməri olacaq. Bu müqavilənin imzalanması ilə İran Asiyanın energetia bazarında böyük paya sahib olacaq.
İranın neft nazirinin xüsusi nümayəndəsi deyib ki, hazırda ölkəsi Pakistanda təbii qazın ixracı üçün 1000 km uzunluğunda boru kəmərinin inşası barədə danışıqlar aparır.
O qeyd edib ki, qazın təzyiqinin saxlanması üçün stansiyanın və 1150 km uzunluğunda 56 düyümlü boru kəmərinin inşası 2,5 milyard dollara başa gələcək. Hazırda boru kəmərinin 900 km-lik hissəsi artıq qurulub. Onun inşasının dəyəri 700 milyon manat təşkil edib.
Yeni qaz kəməri ilə Pakistana sutkada 21,5 milyon kubmetrə qədər qaz ixrac edilməsi planlaşdırılır. Proqnoza görə, qalan 250 km-lik hissənin inşası 750 milyon dollara başa gələcək. Bu təxmini rəqəmdir. Dəqiq məlumat İranın Milli Qaz Şirkəti tərəfindən açıqlanmalıdır.
"Sülh" adlı qaz kəməri üzrə layhihə İran, Pakistan və Hindistan tərəfindən regionda sülh və təhlükəsizliyə yardım məqsədilə hələ 1990-cı ildə hazırlanıb.
İRNA agentliyinin məlumatına əsasən, layihə üzrə üç ölkə arasında danışıqlar 1994-cü ildə başlayıb. Lakin üçtərəfli müqavilənin əldə edilməsi Hindistan və Pakistan arasında gərgin münasibətlərə görə mümkün olmayıb.
Hindistan danışıqların son bir neçə mərhələsində iştirak etməyib və İran bu ölkəni prosesə qoşulmağa çağırıb.
Layihənin Hindistan və Pakistana əhəmiyyətli dərəcədə fayda verəcəyi gözlənilir. Bu ölkələrin enerjidaşıyıcılarına sürətlə artan daxili tələbatı təmin etmək üçün kifayət qədər təbii qaz ehtiyatı yoxdur.
