Azərbaycan, Bakı, 13 avqust / Trend , müxbir E.İsmayılov /
ARDNŞ-nin (Azərbaycan Respublikası Dövlət Neft Şirkəti) Gürcüstanda yeraltı qaz anbarının yaradılmasında iştirakı məsələsi bu gün qonşu ölkənin energetika naziri Aleksandr Xetaqurinin Bakıya səfəri çərçivəsində müzakirə olunacaq. Bu barədə cümə axşamı ARDNŞ prezidenti Rövnəq Abdullayev deyib. Gürcüstanın Azərbaycandakı səfirliyindən bildirildiyi kimi, hazırda Gürcüstanın energetika naziri Bakıda səfərdədir.
"Bu gün Gürcüstanın energetika naziri ilə müzakirə mövzularından biri məhz bu məsələ olacaq", - Abdullayev deyib.
Abdullayevin dediyi kimi, ARDNŞ hələ də Gürcüstanda yeraltı qaz anbarının inşasında iştirak etmək niyyətindədir. "Bu məsələ üzrə Gürcüstan hökuməti ilə danışıqları davam etdiririk", - o bildirib.
Şirkət prezidentinin dediyi kimi, Gürcüstana qaz idxalının əsas hissəsini ARDNŞ həyata keçirir. Şirkət bu bazarın 75 faizini təmin edir və gələcəkdə ARDNŞ bazarda iştirak payını genişləndirmək istəyir. "Buna görə də, burada 300 milyon kubmetrlik qaz anbarının olması biznesimizə yaxşı təsir göstərəcək", - Abdullayev deyib.
Bir müddət əvvəl Gürcüstanda qaz anbarının layihələndirilməsi üzrə tender elan olunub. Tender əvvəllər neft və qaz hasil olunan yatağın bazasında inşanı nəzərdə tutur.
"Artıq bu layihədə ARDNŞ-nin iştirakını təklif etmişik və şirkət bu məsələyə maraq göstərib. Maraq hələ də qalırsa, layihələndirmə işlərinin yekunlaşdırılmasından sonra ARDNŞ bu layihədə iştirak edə bilər", - daha əvvəl Bakıda Gürcüstanın energetika naziri Xetaquri deyib.
Qaz anbarının inşasının üç fazada həyata keçirilməsi planlaşdırılır: birinci - saxlama gücü 450 milyon kubmetr, ikinci - 1,5 milyard kubmetr, üçüncü - 5 milyard kubmetr.
"İkinci və üçüncü fazalar regional miqyasda gözdən keçirilir. Azərbaycan orada sonradan Avropaya Cənubi Qafqaz və Nabukko qaz kəməri vasitəsilə nəql etmək üçün qaz saxlamaq istəyərsə, bu anbardan istifadə edə bilər", - Xetaquri deyib.
Məqalə müəllifi ilə əlaqə ünvanı: [email protected]
