Azərbaycan, Bakı, 21 sentyabr / Trend , müxbir H.Vəliyev /
Azərbaycan Kibernetika İnstitutu "Mişovdağ Kəlaməddin" quru yatağında neft hasilatı aparan Karasu Operating Company-də (KAOC) proqnozlşadırmanın monitorinq sistemini tətbiq edib. Bu barədə Trend -a "İnnovasiya və İnformasiya Texnologiyaları" laboratoriyasının rəhbəri Qəmbər Quliyev deyib.
Onun sözlərinə görə, texnologiya ötürücülər vasitəsilə küləyin sürəti, təzyiq, temperatur, sürət, məsafə və s. barədə siqnal (informasiya) almağa imkan verir. Sözügedən texnologiyanın istifadəsi inkişafın başlanğıc mərhələsində mikroqəzaların əvvəlcədən müəyyən ediıməsinə imkan verəcək. Hər siqnalda müəyyən əngəllər olur, bunlara müvafiq olaraq, xoşagəlməz insidentləri proqnozlaşdırmağa imkan verilir. Sistem həmçinin elektrik enerjisi xərclərini 70 faizədək azaltmağa imkan verir. Bu da hasilatın maya dəyərinə müsbət təsir göstərir.
Kibernetika İnstitutu böyük iqtisadi və sosial zərərlərə gətirə biləcək obyektlərin proqnozlaşdırmasının nəzəri əsaslarını işləyir. Sözügedən texnologiyanın aviasiya, neft və digər sektorlarda istifadəsi qəza vəziyyətlərini sıfıra endirməyə imkan verəcək. Qazma və ya uçuş prosesində çoxlu küylər və əngəllər qeydə alınır. İnformasiya daşıyıcısı kimi bu əngəllərdən istifadə ilə qəza vəziyyətini proqnozlaşdırmaq olar.
İnstitutun mütəxəssisinin sözlərinə görə, məlumat ötürülməsi texnikasının inkişafı siqnal ötürülməsi nəzəriyyəsinin inkişafı ilə bağlıdır. Belə ki, informasiya birbaşa ötürülmür, məqsəd üçün verilənlər siqnallara çevrilir, daha sonra radiokanal vasitəsilə müəssisənin mərkəzi ofisinə ötürülür.
Bu il analoji sistem "Kürovdağ" quru yatağında neft hasilatı ilə məşğul olan Shirvan Oil şirkətində istifadəyə verilib. Proqnozlaşdırma sistemi həmçinin "Neftçala", "Xıllı" və "Babazanan" quru yataqlarının işlənməsi ilə məşğul olan Anshad Petrol və "Binəqədi" quru yatağını istifadə edən Binəqədi Oil şirkətində də tətbiq ediləcək.
Məqalə müəllifi ilə əlaqə ünvanı: [email protected]
