Azərbaycan, Bakı, 15 oktyabr / Trend , müxbir T.Cəfərov/
İran Parlamentində ölkə daxilində enerji daşıyıcılarının qiymətinin artırılması haqqında qanun təsdiq edilib. Bu məsələ infilyasiyanın artacağı haqda bəzi narahatlıqlara səbəb olub. Lakin İranın Rəqabət Şurası sədrinin fikrincə, baxmayaraq ki, bu layihənin icrası qısa müddət ərzində infilyasiyanın artmasına səbəb olacaq, bununla belə qəbul olunan qərarların gələcəkdə bir çox üstünlükləri olacaq.
2009-cu ilin oktyabrından İranda neft, benzin və neft məhsullarının qiyməti tədricən artırılmalı və bu enerji daşıyıcılarının FOB şərtlərilə Fars Körfəzində satılan qiymətinin 90 faizindən aşağı olmamalıdır. Təbii qazın orta qiyməti isə ixrac olunan qazın qiymətinin ən azı 75 faizini (ƏDV- ilə) təşkil etməlidir.
İranın Rəqabət Şurasının sədri Cəmşid Pəjuyanın fikrincə, parlament bu qərarı qəbul edərkən infilyasiyanı da nəzərə alıb.
"İranda enerji daşıyıcılarının qiymətinin ucuz olması bu enerjidən düzgün istifadə etməməyə səbəb olurdu. Parlamentin bu qərarı enerji daşıyıcılarının istifadəsinin effektiv balanslaşdırılmasına gətirib çıxaracaq", - Pəjuyan deyib.
Onun fikrincə, istehsalat sahəsində enerji daşıyıcılarından istifadəni azaltmaq üçün çox vaxt lazımdır.
"Bunun üçün istehsalat texnologiyası dəyişdirilməli və yeni investisiyalar yatırılmalıdır", - o deyib.
Pəjuyan əlavə edib ki, İranda infilyasiyanın yaranmasına əsas səbəb, büdcə çatışmamazlığı və hökumətin pul siyasətidir.
"Qiymətlərin artması hökumətin büdcə kəsirinin yaxşılaşmasına səbəb olacaq. Hökumətin maliyyə vəziyyətinin düzəlməsi ölkədə infilyasiyanın azalmasına səbəb olacaq. Əlbəttə, İranda qiymətlərin artacağına şübhə yoxdur, lakin bu o demək deyil ki, infilyasiya yüksək səviyyədə olacaq",- Pəjuyan deyib.
Onun fikrincə, əgər İran hökuməti düzgün maliyyə siyasəti apararsa, yüksək infilyasiya gözlənilmir.