Azərbaycan, Bakı, 27 oktyabr / Trend , müxbir A.Bədəlova/
2010-cu ildə Azərbaycanda neft hasilatı təxminən 13,5 faiz artaraq sutkada 1,18 milyon barelə çatacaq, bu barədə ABŞ-ın Energetika İnformasiyası üzrə Dövlət İdarəsinin (EIA) ölkə üzrə qısa hesabatında deyilir.
"Azərbaycanda neft hasilatı yeni neft quyularının işə salınması hesabına artırılacaq", - hesabatda deyilir.
EIA-nın proqnozlarına əsasən, bu ilin yekunlarına görə Azərbaycanda neft hasilatı sutkada 1,04 milyon barel təşkil edəcək ki, bu da 2008-ci ilin neft hasilatından sutkada 0,16 milyon barel çoxdur.
EIA-nın Azərbaycana dair hesabatında deyildiyi kimi, ölkədə 2008-ci ildə neftin 80 faizi "Azəri-Çıraq-Günəşli" yataqları blokunun payına düşüb. EIA "Günəşli" yatağında sutkada 320 min barel səviyyəsində neft hasilatı gözləyir. 2010-cu ilin birinci yarısında "Cıraq" yatağında neft hasilatı ehtimallara görə, sutkada 185 min barel təşkil edəcək.
"Ölkədə neft hasilatının artırılması ilə daxili tələbat 1992-ci ildəki sutkalıq 203 min bareldən 2008-ci ildə sutkada 128 min barelə kimi azalıb ki, bu da neft ixracının əhəmiyyətli dərəcədə artımına səbəb olub", - EIA-nın hesabatında deyilir.
Azərbaycan tərəfindən 2008-ci ildə sutkada 749 min barel neft ixracı EIA-nın qiymətləndirmələrinə əsasən, 2005-ci ildəki ixrac səviyyəsini iki dəfədən çox ötüb.
Azərbaycanda 1997-ci ildən 2008-ci ilə kimi neft hasilatı dörd dəfə artaraq sutkada 875 min barelə çatıb.
BP-nin məlumatlarına əsasən, Azərbaycanın təsdiqlənmiş neft ehtiyatları 7 milyard barel təşkil edib.
