Azərbaycan, Bakı, 16 yanvar / Trend , müxbir E.İsmayılov/
ARDNŞ (Azərbaycan Respublikası Dövlət Neft Şirkəti) fevralda "Günəşli" yatağında quraşdırılması üçün texnoloji qaz-lift platformasının bloklardan birini dənizə göndərəcək. Bu barədə ARDNŞ-dəki mənbə deyib. ARDNŞ-nin tərkibinə daxil olan Heydər Əliyev adına Dərin Özüllər Zavodunda qurulmuş blok dənizə göndəriləcək.
"Blokun tikintisi fevralın ortalarında başa çatdırılacaq və fevral ayı ərzində blok quraşdırılma yerinə göndəriləcək", - mənbə deyib.
3000 tonluq ikinci blok "Neftqaztikinti" Trestinin Zığdakı tikinti-quraşdırma meydançasında ötən əsrin 90-cı illərində hazırlanmış, lakin istifadə olunmamış "Günəşli-20" platforması əsasında inşa edilir. Blokda artıq bərpa işləri başa çatıb, birləşmə hissələri yenidən qaynaq edilib.
Yeni platformanın tikilməsində məqsəd "Günəşli" yatağının neft hasilatının stabilliyini dəstəkləməkdir. ARDNŞ-nin neft və qaz hasilatının əsas həcmi bu yatağın payına düşür. Bu platformanın 2011-ci ildə istismara verilməsi planlaşdırılır.
Platforma "Günəşli" yatağında dənizin 90-92 metr dərinliyində "Günəşli-4" platformasından 50 metr məsafədə qurulacaq. Platformalar öz aralarında piyada körpüsü ilə birləşəcək.
Sosial infrastruktur - yaşayış bloku, yeməkxana, ehtiyat qazma və vertolyot meydançası hər iki platforma üçün ümumi olacaq. Yeni platformanın yuxarı hissəsi sənaye məqsədlərinə xidmət edəcək. Burada 8 maşından ibarət qaz-lift kompressor stansiyası tikiləcək. Stansiyanın köməyi ilə qaz 125 atmosfer təzyiqi altında sıxılaraq laylara vurulacaq.
Texnoloji platformanın hidrotexniki dayaq hissələri "Neftqazelmitədqiqatlayihə" İnstitutunda layihələşdirilib.
