Azərbaycan, Bakı, 04 fevral / Trend , müxbir E.İsmayılov/
ARDNŞ "Bulla dəniz" qaz yatağında dərin kəşfiyyat quyusunun qazılması işlərini 2010-cu ilin sonuna başa çatdırmağı planlaşdırır. Bu barədə ARDNŞ-dəki mənbə bildirib. Əvvəllər qazma işlərinin 2011-ci ilin əvvəlinə yekunlaşması nəzərdə tutulurdu.
Proqnozlara əsasən, yeni quyudan sutkada 500 min kubmetrə yaxın qaz və 80 ton qaz-kondensat hasil edilə bilər.
"Bu quyunun qazılması çərçivəsində işlər davam edir. Bu ilin sonuna işlərin yekunlaşacağı gözlənilir", - mənbə deyib.
Onun sözlərinə görə, hazırda quyunun dərinliyi 2800 metr təşkil edir. Layihə dərinliyi isə 6400 metrdir.
Bu quyunun qazılmasına daha əvvələr başlanılsa da onun dərinliyi 1200 metrə çatdıqdan sonra qazma işləri dayandırılmışdı. Bu yaxınlarda quyunun qazılması üzrə işlərin bərpa edilməsinə dair qərar qəbul edilib.
"Bulla dəniz" yatağı 1975-ci ildən istismardadır. 34 il ərzində quyudan 62 milyard kubmetr qaz və 11 milyon ton kondensat hasil edilib.
"Bulla dəniz" yatağından sutkada 450 min kubmetr qaz hasil edilir. ARDNŞ geoloqlarının fikrincə, bu yataqda hasilatı bir neçə dəfə artırmaq olar.