Azərbaycan, Bakı, 15 iyul /Trend/
ARDNŞ-nin "Azərikimya" İstehsalat Birliyinin müəssisələrində texnoloji qurğu və avadanlıqların əsaslı təmirindən sonra onların təhlükəsiz istismarını, ahəngdar işini, yüksək məhsuldarlığını, təhlükəsizlik texnikası və yanğın təhlükəsizliyini təmin etmək məqsədilə bu günlərdə səmərəli tədbirlər həyata keçirilir. Bu barədə İB-nin məlumatında deyilir.
Müəssisələrdə texniki-təhlükəsizlik tədbirlərini gücləndirmək məqsədilə Birlik rəhbərliyinin sərəncamı ilə hər bir istehsalata, hər bir sexə cavabdeh olan mühəndis və texniki işçi ayrılıb. Təmirə cəlb olunmuş 60-dan artıq briqadanın bütün işçiləri təhlükəsizlik texnikası qaydaları üzrə təlimatlandırılıb, təmir işlərinə yalnız tam hazır olduqdan və bütün təhlükəsizlik tədbirləri yerinə yetirildikdən sonra başlanılıb.
ARDNŞ-nin strukturuna daxil edildikdən sonra əməkçilərin xüsusi geyim və fərdi mühafizə vasitələri ilə təminatında böyük dönüş yaradılıb. Qısa müddət ərzində mindən artıq qoruyucu dəbilqə, 2300 dəst fəhlə geyimi, 1000 cüt ayaqqabı, həmçinin qaynaqçılar üçün xüsusi geyim dəstləri və rezin çəkmələr alınaraq paylanılıb. Yüksəklikdə işləyən fəhlələr qoruyucu kəmər və digər mühafizə vasitələri ilə təmin olunub, onların hər biri tibbi və psixoloji müayinədən keçirilib.
Məhz görülmüş səmərəli tədbirlərin nəticəsidir ki, artıq Etilen-polietilen zavodunda köhnəlmiş və istifadəyə yararsız avadanlıqların yeniləri ilə əvəz olunması sahəsində işlər uğurla aparılır. Xüsusi təhlükəsizliyi təmin etmək üçün boru xətlərinin, arakəsmələrin təcrid olunmasına başlanılıb, aşınmaya uğramış xidmət meydançaları və pilləkənlər təmir edilib.
Gələcəkdə atmosferə və dövri su sisteminə karbohidrogen qazlarının və zərərli maddələrin düşməməsi üçün 15 ədəd istilikdəyişdiricisinin yeniləri ilə əvəz olunması, digərlərinin isə əsaslı təmiri nəzərdə tutulub. Təmir işləri zamanı ortaya çıxan tullantıların təmir zonasından daşınması Birliyin Nəqliyyat və xüsusi texnika idarəsi tərəfindən operativ olaraq həyata keçirilir.
120 m hündürlüyündə olan məşəl qurğusunun əsaslı təmirindən və başlığının dəyişdirilməsindən sonra tullantı qazların tüstüsüz yanması təmin ediləcək, beləliklə də sənaye zonasının və bütövlükdə Sumqayıt şəhərinin ekoloji durumu xeyli yaxşılaşacaq.