Azərbaycan, Bakı, 30 avqust /Trend, müxbir E.İsmayılov/
Almaniyanın ILF injinirinq şirkəti Ukrayna və Polşanın neft nəqliyyat sistemlərini birləşdirəcək Brodı-Plots neft boru kəmərinin tikintisinin texniki iqtisadi əsaslandırılmasının (TİƏ) və ətraf mühitə təsir hesabatının hazırlanması üzrə tenderin qalibi olub. Bu barədə bazar ertəsi Trend-ə telefonla "Sarmatiya" boru kəməri müəssisəsinin baş direktoru Sergey Skripka bildirib.
"Tender ILF şirkətinin qələbəsi ilə başa çatıb. Bu, böyük təcrübəyə malik alman şirkətidir. Lakin bizimlə bağlı məsələdə əsas odur ki, onlar bizim layihə ilə işdə böyük təcrübəyə malikdirlər. 2006-cı ildə ILF Odessa-Brodı-Plots neft boru kəmərinin TİƏ-nin hazırlanmasında iştirak edib", - Skripka qeyd edib.
Onun sözlərinə görə, tərəflər arasında imzalanan müqaviləyə əsasən, Brodı-Plots (Adamov zastavası) boru kəmərinin tikinti layihəsinin TİƏ-si cari ilin dekabrın 10-dək hazırlanmalıdır. TİƏ-nin hazırlanmasında boru kəmərinin son nöqtəsi də müəyyənləşəcək.
Boru kəmərinin TİƏ-nin hazırlanmasında üç şirkətdən ibarət konsorsium yaradılıb. Konsorsiumda lider qismində məhz alman şirkəti çıxış edir.
"ILF konsorsiumda digər şirkətlərlə çıxış edir, lakin o, konsorsiumun lideridir", - Skripka vurğulayıb.
Brodı-Plots neft boru kəmərinin tikintisinin layihəsi Avropa İttifaqının (Aİ) "İnfrastruktur və ətraf mühit" əməliyyat proqramına prioritet layihələr qismində daxil edilib.
Odessa-Brodı neft kəmərinin avers rejimində istifadə olunması onun tikintisi layihəsi çərçivəsində nəzərdə tutulub.
Odessa-Brodı neft kəmərindən Xəzər neftinin Avropaya nəqli üçün istifadə olunması planlaşdırılıb. Ukrayna boru kəmərinin tikildiyi vaxtdan iki il ərzində Xəzər neftinin onunla birbaşa istiqamətdə nəqlinə dair razılaşmaya uğursuz səy göstərib. Şirkətlər tərəfindən konkret təkliflər almayan Ukrayna hökuməti 2004-cü ilin iyununda boru kəmərinin Rusiya neftinin revers istiqamətində nəqli üçün istifadə olunmasına razılıq verib.
Bu halda, neft kəməri tikildiyi vaxtdan revers istiqamətində istifadə olunur ki, bu da Rusiya neftinin Brodıdan Odessaya, daha sonra isə tankerlərlə Qara dəniz istiqamətində nəqlini nəzərdə tutur.
"Sarmatiya" BM-də Ukrayna, Azərbaycan, Polşa, Gürcüstan və Litva iştirak edir. Şirkətin əsas fəaliyyət istiqamətləri layihə-smeta sənədləşməsinin hazırlanması, sərmayələrin cəlb edilməsi, tikinti işlərinin təmin edilməsindən ibarətdir.
Odessa-Brodı neft nəqli layihəsi neftin Ukrayna NEZ-inə çatdırılması və ölkənin tranzit imkanlarının artırılması məqsədilə planlaşdırılıb. Odessa-Brodı neft kəməri uzunluğu 674 km-dir, borunun diametri isə 1020 mm-dir. Neft kəməri və terminalın gücü il ərzində 9-14 mln. ton təşkil edir.
"Sarmatiya" 2004-cü ildə yaradılıb. Hazırda ARDNŞ (Azərbaycan Respublikası Dövlət Neft Şirkəti), Gürcüstanın Neft-Qaz Şirkəti, Litvanın "Klaypedos neft" şirkəti, Polşanın PERN "Pişiyazn" neft nəqli şirkəti və "Ukrtransafta" ASC layihə üzvləridirlər.