Azərbaycan, Bakı, 10 noyabr /Trend/
Azərbaycanın iki quru yatağında neft hasilatı ilə məşğul olan "Salyan Oil" əməliyyat şirkəti "Qarabağlı" yatağında neft istismar quyusunun qazılmasını başa çatdırıb. Bu barədə çərşənbə günü neft-qaz yatağındakı mənbə bildirib. Əməliyyat şirkəti "Qarabağlı"dan başqa, "Kürsəngi" yatağında da işləyir.
Onun sözlərinə görə, quyunun dərinliyi 3500 metrdir. Quyunun cari debiti sutkada 10-15 ton neft təşkil edir. Yaxın vaxtlarda neft hasilatının sutkada 20 tonadək çatdırılacağı gözlənilir.
Həmçinin, mənbənin sözlərinə görə, yaxın vaxtlarda "Salyan Oil" "Qarabağlı" yatağında eyni dərinlikdə daha bir istismar quyusunun qazılmasına başlayacaq.
Yataq Azərbaycanın Salyan rayonunda (Bakıdan 150 kilometrlik məsafədə) yerləşir. Bəzi mütəxəssislərin fikrincə, müqavilə meydanında qalıq neft ehtiyatları 150 milyon tonu ötür.
"Kürsəngi-Qarabağlı" quru yatağının işlənməsinə dair sazişin fəaliyyət müddəti 25 ildir. Layihənin səhmdarları bunlardır: ARDNŞ - 50 faiz, iki Çin şirkəti - China "National Oil & Gas Exploration and Development Corp." (CNODC) və "Fal Chin" - hər biri 25 faiz.
