Azərbaycan, Bakı, 2 dekabr /Trend, müxbir E.İsmayılov/
Macarıstan "Azerbaijan-Georgia-Romanian Interconnector" (AGRI) layihəsi çərçivəsində yaradılan birgə müəssisənin tərkibinə yalnız onun qeydiyyatdan keçməsindən sonra daxil olacaq. Bu barədə cümə axşamı ARDNŞ-dəki (Azərbaycan Dövlət Neft Şirkəti) mənbə məlumat verib.
"Bu günlərdə bu layihə çərçivəsində birgə şirkətin qeydiyyatı keçirilməlidir. İndi danışıqlar macar tərəfin bu şirkətə daxil olması ilə bağlı aparılır, çünki Macarıstan AGRI layihəsinə böyük maraq göstərir", - mənbə bildirib.
Onun sözlərinə görə, macar tərəfi birgə müəssisənin tərkibinə onun yaradıldığı mərhələdə daxil olmaq istəyir. Lakin sənədlər artıq qeydiyyatdan keçmək üçün göndərilib və bu prosesi yubatmamaqdan ötrü Macarıstanın onun başa çatmasından sonra daxil olması barədə qərar qəbul edilib.
Birgə müəssisə yeni layihənin texniki-iqtisadi əsaslandırılmasının (TİƏ) hazırlanması prosesi və maliyyə mənbələrinin axtarışı ilə məşğul olacaq. Şirkət Rumıniyada yaradılır və Azərbaycan, Rumıniya və Gürcüstan iştirakçı tərəflərdir.
TİƏ-nin hazırlanmasına yaxın vaxtlarda başlanacaq. Mənbə bildirib ki, bununla məşğul olacaq şirkət hələ müəyyən olunmayıb.
Onun sözlərinə görə, nəzərə almaq vacibdir ki, yanvarın 1-dən Macarıstan Aİ-yə sədrlik edəcək ki, bu da öz növbəsində AGRI layihəsinin həyata keçirilməsinə böyük kömək edəcək.
Mənbənin qeyd etdiyi kimi, bir çox ölkələr bu layihəyə maraq göstərirlər, lakin hələlik yalnız Macarıstan AGRI-də iştirak haqqında öz istəyini rəsmən ifadə edib.
Bundan əvvəl Azərbaycan sənaye və energetika naziri Natiq Əliyevin dediyi kimi, layihənin gücü üç variantda nəzərdə tutulur - ildə iki milyard kubmetr qaz, beş milyard kubmetr və səkkiz milyard kubmetr. İlkin məlumatlara görə, layihənin gücündən asılı olaraq, onun dəyəri 1,2 milyardla 4,5 milyard avro arasında dəyişir.
Sentyabrın 14-də Bakıda Azərbaycan, Gürcüstan, Rumıniya və Macarıstan AGRI layihəsi üzrə Bakı Bəyannaməsi imzalanıb.
Layihə Azərbaycan qazının Gürcüstanın Qara dəniz sahillərindən qaz kəmərləri vasitəsilə nəqlini, orada xüsusi terminalda mayeləşdirilməsini və bundan sonra tankerlərlə Rumıniyanın Konstansa limanındakı terminala çatdırılmasını nəzərdə tutur. Sonra maye qaz təbii qaz halına gətiriləcək və ölkə ərazisində mövcud olan qaz infrastrukturlarından istifadə olunmaqla Rumıniya və digər Avropa ölkələrinin tələbatının təmin edilməsinə yönəldiləcək.