Azərbaycan, Bakı, 23 dekabr /Trend/
"Ekol Mühəndislik Xidmətləri" QSC "Azneft" İstehsalat Birliyinin "Abşeronneft" NQÇİ-nin mədən ərazilərində çirklənmiş torpaqların rekultivasiyası və bioremediasiyası layihəsini uğurla davam etdirir. Ötən ay QSC layihənin ikinci mərhələsinin icrasına başlayıb. Bu barədə Trend-ə QSC-dən cümə axşamı verilən məlumatda deyilir.
Bu mərhələdə "Abşeronneft" NQÇİ-nin 7 hektara qədər mədən ərazisində çirklənmiş torpaqların rekultivasiyası və 18,6 min kubmetr şlamın ərazidən çıxarılaraq bioremediasiya olunması nəzərdə tutulub. İcra müddətində layihə sahəsindən 18,6 min kubmetr neftşlam çıxarılmış əraziyə 11 163 kubmetr ştib, 15 842 kubmetr torpaq daşınaraq yayılıb. Həmin əraziyə 4 500 ədəd eldar şamı, 4 500 ədəd isə zeytun ağacları əkilib. Nəzərdə tutulmuş işlər dekabrın 23-də müvəffəqiyyətlə başa çatdırılıb.
"Abşeronneft" NQÇİ-nin yaşayış massivinin yaxınlığında yerləşən bu ərazisi QSC-nin həyata keçirdiyi tədbirlər nəticəsində öz simasını tamamilə dəyişib. Bu layihənin icrası eyni zamanda, Pirallahı qəsəbəsinin ekoloji vəziyyətinin yaxşılaşdırılmasına və ətrafda yaşayan əhalinin sağlamlığının mühafizə olunmasına öz müsbət təsirini göstərəcək.
"Ekol Mühəndislik Xidmətləri" QSC "Abşeronneft" NQÇİ-nin mədən ərazisində çirklənmiş torpaqların bioremediasiyası işlərini davam etdirir.
