Azərbaycan , Bakı, 25 fevral /Trend, müxbir A.Axundov/
Azerbaijan-Georgia-Romanian Interconnector (AGRI) layihəsinin texniki-iqtisadi əsaslandırması (TİƏ) 2012-ci ilin yayınadək hazırlanacaq. Bu barədə cümə günü Trend-ə Bakıda Macarıstanın Milli İnkişaf Nazirliyinin iqtisadiyyat və iqlim dəyişiklikləri məsələləri üzrə dövlət katibinin müavini Peter Olajos bildirib. Bu layihə Qara dəniz vasitəsilə sıxılmış qazın Rumıniyaya tədarükünü nəzərdə tutur.
"Qiymətləndirmə işlərinin yekunları üzrə layihənin gücü və dəyəri, eləcə də boru kəmərinin ətraf mühitə təsiri müəyyən olunacaq", - o, bildirib.
Layihə Azərbaycan qazının Gürcüstanın Qara dəniz sahilinə qaz kəməri ilə nəqlini nəzərdə tutur ki, bu qaz da xüsusi terminalda mayeləşdirilərək, tankerlərlə Rumıniyanın Konstansa limanı terminalına nəql olunacaq. Gələcəkdə maye qaz təbii qaz halına gətirilərək, ölkə ərazisində mövcud olan qaz infrastrukturu vasitəsilə Rumıniya və digər Avropa ölkələrinin qaz tələbatını ödəmək üçün istifadə olunacaq.
Olajos layihəyə yeni iştirakçıların daxil olmasının mümkünlüyünü də istisna etməyib.
"Əgər bu layihə kimisə maraqlandırırsa və əgər bu hazırkı iştirakçılar üçün əlverişli olarsa, onda layhihədə yeni üzvlərin iştirakı istisna olunmur", - Olajos bildirib.
Ötən il sentyabrın 14-də Bakıda Azərbaycan, Gürcüstan, Rumıniya və Macarıstan AGRI layihəsi üzrə Bakı Bəyannaməsini imzalayıblar. Bu il fevralın 14-də Azərbaycan, Gürcüstan, Rumıniya və Macarıstan "Azerbaijan-Georgia-Romanian Interconnector" (AGRI) layihəsinin həyata keçirilməsi çərçivəsində protokol imzalayıblar. İmzalanan sənəddə AGRI layihəsinin texniki iqtisadi əsaslandırmasının hazırlanmasının 2012-ci ilin aprel ayından gec olmayaraq başa çatdırılmasının labüdlüyü göstərilib. Layihədə tərəfdaş şirkətlərin TİƏ-nin hazırlanmasına hazırlıq üçün maliyyələşmənin cəlb edilməsində dəstək göstərməsinin zəruriliyi də vurğulanıb. Sənəddə qeyd edilir ki, AGRI çərçivəsində işlərin sürətləndirilməsi ilə Azərbaycan qazının Avropa bazarına çatdırılması üzrə daha qısa marşrutun tapılması və Rumıniya-Macarıstan (Arad-Şeged) interkonnektorunun yaradılması nəzərdə tutulur.
Bundan əvvəl AGRI layihəsi çərçivəsində Rumıniyada birgə müəssisə qeydiyyatdan keçib. O, yeni layihənin TİƏ-nin hazırlanması və maliyyələşdirmə mənbələrinin axtarışı ilə məşğul olacaq. İştirakçılar qismində Azərbaycan, Rumıniya və Gürcüstan tərəfləri çıxış edirlər. Mənbənin dediyinə görə, Macarıstan tərəfinin birgə müəssisəyə qoşulması artıq ilkin mərhələdə gözlənilir.
AGRI layihəsinin gücü üç variantda nəzərdə tutulur - ildə iki milyard kubmetr qaz, beş milyard kubmetr və səkkiz milyard kubmetr. İlkin məlumatlara görə, layihənin gücündən asılı olaraq, onun dəyəri 1,2 milyardla 4,5 milyard avro arasında dövr edir.