Azərbaycan, Bakı, 9 iyul /Trend, müxbir A.Bədəlova/
ARDNŞ-nin "Neftqazelmitədqiqatlayihə" İnstitutunda şirkətin "Yay təcrübəsi proqramı"nın iştirakçıları olan tələbələrlə görüş keçirilib.
"Şirkət bu il ikinci dəfə Azərbaycanın və xarici ölkələrin müxtəlif ali məktəblərində neft-qaz, neft-qaz qurğuları, qazma, geofizika, geologiya, proseslərin avtomatlaşdırılması, kompüter, inşaat, boru kəmərləri, ekologiya, neft-kimya və kimya mühəndisliyi, energetika, iqtisadiyyat, proqramçı, insan resurslarının idarə edilməsi və hüquqşünas ixtisasları üzrə təhsil alan Azərbaycan vətəndaşı olan tələbələrə yay tətili müddətində istehsalat təcrübəsi keçmək üçün "Yay təcrübəsi proqramı" keçirir", - Dövlət Neft Şirkətinin kadr, rejim və informasiya texnologiyaları üzrə vitse-prezidenti Xalik Məmmədov bildirib.
Şirkətin İnsan Resursları Departamentinin rəisi Asif Bəkirli qeyd edib ki, proqram tələbələrin istəyindən asılı olaraq, 1 və ya 2 ay müddətində davam edəcək.
Proqramın şərtlərinə əsasən, tələbə ilə həmin müddətə müvəqqəti əmək müqaviləsi bağlanır və o, ən aşağı dərəcəli mütəxəssis vəzifəsində işə qəbul olunur. Təcrübəçi işlədiyi vaxta və vəzifəsinə müvafiq olaraq əməkhaqqı alır.
Proqramda təhsil aldığı ali məktəbdən asılı olmayaraq, qeyd olunan ixtisaslar üzrə bakalavriatın 2, 3, 4-cü kursları və magistraturanın 1 və 2-ci kurslarını bitirən tələbələr iştirak edirlər.
Keçirilən müsabiqənin gedişində iki həftə ərzində ölkə daxilində və xaricdə 31 ali məktəbdə təhsil alan 600-dən artıq tələbə müraciət edib.
"Yay təcrübəsi proqramı"nın iştirakçıları sırasına İnşaat Mühəndisləri Akademiyasının rektorluğu ilə ARDNŞ rəhbərliyinin razılaşmasına əsasən, bu ali təhsil ocağında əla qiymətlərlə oxuyan daha 40 tələbə də qatılacaq.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
