...

ARDNŞ "Ümid" yatağında kəşfiyyat quyusunun qazılması çərçivəsində işlərin üçdə birini başa çatdırıb

Energetika Materials 19 İyul 2011 19:22 (UTC +04:00)

Trend-i buradan izləyin

Azərbaycan, Bakı, 19 iyul /Trend, müxbir E.İsmayılov/

ARDNŞ (Azərbaycan Respublikası Dövlət Neft Şirkəti) bu ilin sonunadək Xəzərin Azərbaycan sektorundakı iri qaz-kondensat yatağında ikinci kəşfiyyat quyusunun qazılmasını başa çatdıra bilər. Bu barədə çərşənbə axşamı Trend-ə ARDNŞ-dəki mənbə deyib.

Onun sözlərinə görə, hazırda quyunun dərinliyi 2237 metr təşkil edir. Quyunun layihə dərinliyi isə 6500 metrdir.

"Qazma işlərinin başa çatacağı tarix barədə danışmaq çətindir, çünki qazma çətin dəniz şəraitində aparılır. Lakin maksimum bu ilin sonunadək işlər başa çatacaq", - mənbə qeyd edib.

Bir müddət əvvəl ARDNŞ prezidenti Rövnəq Abdullayevin dediyi kimi, ikinci kəşfiyyat quyusunun qazılması yatağı konturlaşdırmaq üçün zəruridir.

İkinci quyunun qazılması zamanı birinci quyunun qazılması prosesində aşkar edilən yatağın bütün xüsusiyyətləri nəzərə alınacaq.

ARDNŞ mütəxəssislərinin qiymətləndirmələrinə görə, yataqda ehtiyatların həcmi 250 milyard kubmetr qaz və 40 milyon ton qaz-kondensat təşkil edir.

Xəzərin Azərbaycan sektorundakı "Ümid" yatağı Bakının 75 kilometrliyində, qurudan 40 kilometr uzaqlıqda yerləşir. Burada 1953-cü ildə ilk dəfə geofiziki işlər aparılıb. Bu işlər 1972-ci ildə daha təkmilləşdirilmiş şəkildə yenidən həyata keçirilib. Daha sonralar, 1977-ci ildən 1992-ci ilədək doqquz quyu qazılsa da, onlardan heç biri nəticə verməyib.

Xəbər lenti

Xəbər lenti