Azərbaycan, Bakı, 22 iyul /Trend, müxbir E.İsmayılov/
Təhlükəsizliyin təmin olunması və qaz sızmasının qarşısının alınması məqsədilə "Azəriqaz" İB Azərbaycanın magistral qaz kəmərlərində nəzarət həyata keçirir. Trend-in məlumatına görə, bu barədə cümə günü "Açıq mətbuat saatı" çərçivəsində ARDNŞ-nin (Azərbaycan Respublikası Dövlət Neft Şirkəti) "Azəriqaz" İstehsalat Birliyinin Təhlükəsizlik, ekologiya və keyfiyyətə nəzarət şöbəsinin rəis müavini Kamal Tarverdiyev bildirib.
Onun sözlərinə görə, magistral qaz kəmərlərində nəzarət İB-nin balansında olan səkkiz şöbənin işçiləri tərəfindən həyata keçirilir.
"Bununla yanaşı, təkcə qaz kəmərlərinin özlərinə deyil, müvafiq təsərrüfata, o cümlədən qaz-kompressor stansiyalarına və digər obyektlərə də baxış keçirilir", - Tarverdiyev deyib. Gündəlik baxış bütün magistral qaz kəmərlərində və onlar üçün zəruri olan xidmət təsərrüfatlarında aparılır. Bu, həmçinin Azərbaycanın öz qazını ölkə hüdudlarından kənara nəql etdiyi qaz kəmərlərinə də aiddir.
Azərbaycanda bütün magistral qaz kəmərlərinin uzunluğu 4500 kilometr təşkil edir. Qaz kəmərlərinin normal işinin təmin edilməsi üçün onları beş ildə bir dəfə təmir edirlər.
