Azərbaycan, Bakı, 2 avqust /Trend, müxbir E.İsmayılov/
Azərbaycanın Standartlaşdırma, Metrologiya və Patent üzrə Dövlət Komitəsi yanında neft və qaz üzrə texniki komitə cari ilin sonunadək yaradılacaq. Bu barədə cümə günü Trend-ə dövlət komitəsindən deyiblər.
"Bütün lazımi tədbirlər görüləcək ki, komitənin yaradılması üzrə iş, əvvəllər planlaşdırıldığı kimi, cari ilin sonunadək başa çatsın", - mənbə bildirib.
Onun sözlərinə görə, yaxın vaxtlarda müvafiq fəaliyyət fəallaşdırılacaq ki, 2011-ci ilin sonunadək struktur yaradılsın və fəaliyyətə başlasın.
Bundan əvvəl Dövlət Komitəsinin Texniki tənzimləmə və standartlaşdırma şöbəsinin müdiri Sabiq Abdullayevin dediyinə görə, komitənin tərkibinə yeddi alt komitə daxil olacaq. Texniki komitə bütün maraqlı tərəflərin, dövlət və qeyri-dövlət orqanlarının, neft və qaz istehsalçısı və satıcılarının forumudur. Komitədə ARDNŞ sədrlik edəcək.
Azərbaycanda bu sahədə həm milli AZS standartları, həm də regional dövlət standartları qüvvədədir.
Komitə neft və qaz sahəsində mövcud olan bütün standartları nəzərdən keçirəcək və onların günün tələblərinə cavab verməsini müəyyənləşdirəcək. Günün tələblərinə uyğunsuzluq aşkarlanacağı təqdirdə, Azərbaycanda neft-qaz sahəsində qazmadan başlayaraq neft məhsullarının istehsalınadək hansı standartların tətbiqinin lazım olduğu müəyyənləşdiriləcək. Hansı standartların tətbiqinin lazım olduğu müəyyənləşdirildikdən sonra tədbirlər planı hazırlanacaq və bunun əsasında bir neçə il ərzində Azərbaycanın neft və qaz sahəsindəki bütün standartlar fondu yenilənəcək.
