Azərbaycan, Bakı, 3 avqust /Trend/
Bu il ARDNŞ "Qazprom" şirkəti ilə ortamüddətli müqavilə çərçivəsində Rusiyaya 2 milyard kubmetrdən çox olmayan həcmdə qaz tədarük edəcək. Bu barədə çərşənbə günü Trend-ə ARDNŞ-dəki mənbə deyib.
"Bu il Rusiyaya müqavilə üzrə nəzərdə tutulan həcmdə - 2 milyard kubmetr qaz tədarük ediləcək", - mənbə bildirib.
Onun sözlərinə görə, ilin əvvəlindən Azərbaycandan Rusiyaya 1,09 milyard kubmetr qaz ixrac edilib.
2010-cu ildə ARDNŞ Rusiyaya 800 milyon kubmetrə yaxın qaz ixrac edib.
Azərbaycan qazının Rusiyaya alqı-satqısı üzrə ortamüddətli müqavilə 2009-cu il oktyabrın 14-də Bakıda imzalanıb. 2010-cu il sentyabrın əvvəlində Bakıda imzalanan müqaviləyə əlavəyə görə, 2011-ci ildə "Qazprom "iki milyard kubmetr, 2012-ci ildə isə iki milyard kubmetrdən çox qaz alacaq.
Rusiyaya Azərbaycan qazının tədarükünə 2010-cu il yanvarın 1-dən başlanılıb.
