Azərbaycan, Bakı, 7 fevral /Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) "Azəriqaz" İstehsalat Birliyi (İB) tərəfindən Bakıda əhaliyə verilən sutkalıq qaz həcmi 15,3 milyon kubmetr təşkil edir. Fevralın 2-nə olan məlumata əsasən, bu göstərici 15 milyon kubmetr olub. Bu barədə çərşənbə axşamı Trend-ə İB-nin mətbuat xidmətinin rəhbəri Kamandar Eyvazlı bildirib.
"Ölkədə əhaliyə sutkalıq 26 milyon kubmetr qaz verilir, bundan 15,3 milyon kubmetri Bakının, qalanı isə ölkənin bölgələrinin payına düşür", - Eyvazlı qeyd edib.
Onun sözlərinə görə, ölkə kifayət qədər qaz ehtiyatına malikdir və buna görə də istehlakçıların yanacaqla təminatında problem müşahidə edilmir. Yaranan lokal problemlər isə qısa müddət ərzində aradan qaldırılır.
"Azəriqaz" İB Azərbaycan ərazisində qazın tədarükü və satışı məsələləri ilə məşğul olur.
